Western Conf finals-ah Golden State Vs Rockets

Nimin zing khan Golden State Warriors leh Houston Rockets ten New Orleans Pelicans leh Utah Jazz te chu game 5-ah an hneh a, 4-1 ve ve a series lain Western Conference finals an thleng. Finals game 1 hi May 5, Thawhlehni zing dar 6:30-ah Toyota Center, Houston-ah khelh a ni ang.

GSW an chungnung
Golden State Warriors hian kum 2015 aṭang khan Western Conference finals hi an la thleng ziah a, a chak zawkah an ṭang vek a, tun season-ah a vawi li nan finals an thleng.

Regular season-ah Houston Rockets tluk pha loin phanihna ni mah se GSW hian playoff-a San Antonio Spurs leh New Orleans Pelicans te chu 4-1 ve vein an hneh a, harsatna an tawk lo. Nimin zinga Pelicans an hneh ṭum hian GSW tan Stephen Curry bawk langsarin point 28 a nei a, Kevin Durant (24 pts), Klay Thompson (23) leh Draymond Green (19) ten an thlawp ṭha.

Green hian double double neiin rebounds vawi 14 a la a, kum 28 mi hian semifinal a hmang ṭha hle. Pelicans nen vawi nga an inkhelhah GSW tana rebounds leh assists ngah ber a ni vek.

Golden State coach Steve Kerr chuan, "Finals khelh hmain ni nga kan nei a, ngai kan awh hman a ṭul ang," tiin a sawi a, kum li chhung a zawna Conference Finals an thleng thei chu lawmawm a tih thu a sawi.

Rinkai Rockets
Houston Rockets-in Chris Paul leh James Harden an kawl a, regualar season-ah an club history-a an record ṭhat ber ṭum an tawng a, seeded number 1 an ni. Rockets-in game 5-a Utah Jazz an hneh ṭum pawh hian Chris Paul a che ṭha a, point 41 zet neiin assists vawi 10 a nei a, turn over a nei lo. Harden-a'n point 18 a nei ve bawk.

Houston-in conference final an thlen hnuhnun ber chu kum 2015 kha a ni a, hemi ṭum hian Steve Kerr-a enkawl Golden State Warriors an hneh lo. Tun ṭumah hian Western Conference-ah seeded number 1 an ni a, amaherawhchu an khingpui tur GSW hi champion lai an ni.

Eastern lam
Eastern Conference Cleveland Cavaliers-in conference finals an lut tawh a, an khingpui tur a la hriat loh.

Tukin zing dar 5:30 hian Boston Celtics leh Philadelphia 76ers ten game 5 an khel a, Celtics hian 3-1 a hma hruai mekin finals lut turin vawi khat chiah chak an mamawh tawh.