United-in FA Cup atan inbuatsaih dawn

Manchester United-in zanin dar 12:15 hian West Ham United hmachhawn turin London Stadium an tlawh dawn a, Jose Mourinho hote tan FA Cup final atana inbuatsaihna ṭha tak a ni thei ang.

West Ham erawhin Inrinnia Leicester City an hneh avangin Premier League aṭangin an tla thei tawh lo. David Moyes-a enkawl Hammers hian point 28 an hmu tawh a, 15-naah awmin a thiam 10 zinga la inhlangkai thei an ni.

Lukaku leh a dang
United striker Romelu Lukaku chu Arsenal an hneh ṭuma a inhliam avangin Brighton & Hove Albion an hneh loh ṭumin a inlan thei lo. Belgian striker aia lut Marcus Rashford leh Anthony Martial te an hriam tawk lo.

Inkhelh banah Jose Mourinho chuan Lukaku a chhawr reng chhan chu midang aia a ṭhat vang a nih thu a sawi a, hei vang hian Portuguese manager hian FA Cup final hmain chhawr ngei a duh ang. Amaherawhchu Everton striker hlui a la dam chian loh avangin Pathianni zana Watford nen an inkhelh hunah a inlan a rinawm zawk.

Brighton nena inlan lo dang Antonio Valencia leh Alexis Sanchez te erawh an khelh theih a rinawm tawh a, United-in FA Cup an la khelh dawn avangin Wembley Stadium-a inlan duh tan match hmabakah khelh ṭhat a ṭul ang.

Chicharito a inhliam
West Ham-in hliam vangin Javier Hernandez, Michail Antonio, James Collins, Winston Reid, Pedro Obiang leh Sam Byram (ankle) te chu damloh vangin a khel thei lo a, Manchester City aṭanga loan hmanga an hawh goalkeeper Joe Hart pawh damlohna vangin a dinhmun a chiang lo.

Chicharito hi Old Trafford-a kum nga chhung a cham chhungin mipui ṭan a hlawh a, match 157-ah goal 59 a khung. Mexican striker hi inlan thei lo mah se Patrice Evra chuan a club hlui a hmachhawn dawn.

Veteran left back Evra hi United tan vawi 379 a inlan hman a, goal 10 khungin kum riat chhungin Premier League nomawi vawi nga bakah Champions League vawi khat a chawi pui a, captain armband hial chelh thei a ni.