Madrid-ah Halep a chak zel

World number 1 Simona Halep chuan a zawna a vawi thum nan Madrid Open nomawi chawi a tum a, amah dal thei tu a la tawng lo. Thawhlehni zan khan Halep hian Manolo Santana hnehin last 16 a inhlangkai.

2016 leh 2017 champion Halep-i'n a match hmasa zawkah game khat chiah hloh chungin hnehna a chang tawh a, Santana lakah pawh set hmasa zawkah game a hloh miah lo, 6-0, 6-3 in hnehna a chang thei a ni. Quarterfinal lut tur chuan Czech Republic Kristyna Pliskova a paltlang leh a ngai ang.

Romanian nula Halep hi clay court-a inkhel thiam tak a ni, inelna lian French Open-ah pawh final vawi hnih a lut tawh. Mahse, vanduai thlak takin a chak lo zawkah a ṭang zel, season tira khelh Australian Open-ah pawh pahnihna a ni leh a, kumin hian a vawi khat nan Grand Slam nomawi chawi ngei a tum ruh hle–inbuatsaihna ṭha takin a nei mek.

Inkhel dangah Petra Kvitova chuan 6-3, 7-6 (10/8) in Monica Puig chu a hneh a, tun hnaiah a zawnin match sarih chhung hnehna a chang ve chiah–Halep elphak thei tura ngaih a ni. World number 10 Kvitova hian a match lehpekah chuan Anett Kontaveit a tum dawn a ni.