Blatter-a'n World Cup thlen tawm duh lo
FIFA president hlui Sepp Blatter chuan World Cup chu ram pakhatin thleng se a duhthu a sawi nawn. FIFA chuan June 13 hian Moscow, Russia-ah 2026 World Cup thlengtu tur chungchangah thutlukna a siam dawn. CONCACAF aṭangin United States, Canada leh Mexico ten thlen ṭawm an dil a, Africa aṭangin Morocco-in thlen dilna an thehlut ve bawk.
World Cup leh a thlengtu
FIFA World Cup hi kum 1930 khan team 13-in bul an ṭan a, kum li danah neih niin team 16-ah pung chho nghalin 1982 aṭangin ram 24-ah a pung chho leh a, 1998 WC aṭangin ram 32-in an khel ṭan. January 10, 2017 khan FIFA Council chuan kum 2026 aṭangin ram 48 a tipung turin thutlukna an siam.
FIFA chuan World Cup hi khawmualpui hrang hrangin inthlen chawk turin an duh a, kumina thlengtu Russia awmna UEFA leh kum 2022 thlengtu tur Qatar awmna AFC te tan kum 2026 thlen dil a rem ve lo. Kum 2026 hi CAF, CONCACAF, CONMEBOL leh OFC ten an dil thei a, CONCACAF leh CAF aṭangin dilna hi a awm ta a ni.
Kum 2010 khan South Africa chuan a thleng a, hei hi Africa-in a thlen awmchhun a ni a, kum 1994 khan USA chuan thlengin CONCACAF in a thlen hnuhnung ber ṭum a ni.
Blatter-a ngaihdan
Sepp Blatter-a'n FIFA president hna a chelh lai hian Japan leh South Korea chuan a thleng kawp tawh a, hemi ṭum hi ṭha
a tih loh thu a sawi a. Hei bakah hian kum 2010-a Libya leh Tunisia te thlen ṭawm tum bakah kum 2018 atan Spain leh Portugal bakah Netherlands leh Belgium te thlen kawp dilna chu ram pahnih aia tam thlen an duh loh avanga an hnawl thu a sawi.
Kum 82 mi Blatter chuan, "Pakhat chauh pawhin ṭha takin an thleng thei tih an lantir tawh hnua ram lian pathum in thlen an tum hi a ṭhatna ka hre ve lo," tiin in thlen ṭawm a duh lo.
Tun ṭuma diltu Morocco hian 1994, 1998, 2006 leh 2010 te khan thlen an lo dil tawh a, United States, France, Germany leh South Africa te an tluk pha lo. Tun ṭumah hian an thleng thei a nih chuan Africa ram zinga thleng thei pahnihna an ni dawn a, amaherawhchu United States, Canada leh Mexico te inhlawm khawm chu dawng thei tura beiseiawm zawk an ni.
Hrem lai Blatter chu
Joseph Sepp Blatter hian June 8, 1998 leh December 21, 2015 chhung khan FIFA president hna hi a chelh. Ei rukna thubuai a neih avangin kum riat chhung atan an hrem zet a, hemi hnu hian kum ruk atan hremna hi tihniam lehin kum 2022 thleng hrem a ni.
FIFA president hlui hian UEFA president hlui Michel Platini hnehah dan lo angin pound maktaduai 1.3 an pe tih an hriatchhuah vang a ni. Hemi chungchang zawhna chhangin Blatter chuan, "Ka thil tih emaw kan thil tih avanga ka hming hliauna hi ka tih bo theih ngei ka ring. A hlawh pek tura kan tiam ang kan pe a ni mai a, FIFA lehkhabuah ziakin a awm vek. An hlawh pek tura tih vek tawh pek chu eng nge a sualna ka hre lo," tiin thil awm dan a sawifiah.
Blatter hian kum 2015-a buaina a tawh lai khan 'thih a hnaih thu a sawi' a, FIFA president hlui chuan, "Damlohna lam a kawk lo a, min ṭhawn zia ka sawina zawk a ni. Ka vanneihna chu ka thluak leh kan thinlungah harsat ka tawk lo a, a bak chu a pawimawh lo," tiin a rilru a nat thu a sawi.
FIFA-in Blatter an hrem hma hian Nobel Peace prize dawng thei turin a chungchang an ngaihtuah a, hrem a nih rualin an titawp nghal. Blatter chuan, "Hrem ka nihna chhan tur a awm lo, hunin ka dik tih chu a thai lang ang. Nobel Prize kha ka tana tih a ni lo a, FIFA tan zawk a ni a, kan hnathawh avanga beisei zawk kan ni," tiin pawl hming ṭhatna tur a nih thu a sawi.