FIFA-in Russia hrem

Football thuneitu sang ber FIFA chuan Russian Football Union chu £22,000 a chawitir. Russia hi March thla a France nen friendly match an khelh ṭumin chi inthliarna rawngkaia dan an bawhchhiat vanga hrem an ni.

Ram pahnihte an intawn ṭumin World Cup thleng tur Russia hi 3-1 in an tlawm a, Les Bleus player pawimawh Paul Pogba, Ousmane Dembele leh N'Golo Kante te chu an vun rawng vanga au nawmnah an ni.

France leh Russia ten friendly an khelhna hi Krestovsky Stadium, St Petersburg-ah a ni a, kumin World Cup an khelhna tur stadium zinga pakhat a ni. Anti-racism campaign group pakhat Kick It Out president Lord Herman Ouseley chuan, "A lungchhiatthlak" tiin thil thleng chungchang a sawi.

FIFA chuan thuchhuah siamin, "Thil thleng kha video aṭanga ennawn a nih hnuah football dan bawhchhiatna a awm ngei tih hriat a ni a, chuvangin Russian Football Union hi hrem an ni. Infiamna khawvelah hian chi inthliarna hi awm miah lo se tih hi kan duhdan leh hmalakna a ni," tiin an sawi.