World Cup atan Neuer a chiang lo

Bayern Munich goalkeeper Manuel Neuer chuan a hliam a dam mek zel thu a sawi a, chutih rualin FIFA World Cup a khel ngei dawn em tih a sawi chiang thei lo thung.

Kum 32 mi Neuer hian Thawhlehni khan team training a zawm pumhlum tawh. Mahse, 16 September 2017-a Mainz nen an intawn hnuah khelmual chhunga a la inlan leh loh avangin a hma hun hi chiang takin a sawi ngam lo.

Germany captain Neuer chuan, "Ka dinhmun a ṭha zel a, hma pawh ka sawn tawh hle. Chutihrualin ka tan bakah team leh Germany tana ṭha ber turin thutlukna ka siam a ngai ang. Dam chak viau mah ila thil chiang a la awm thei lo, inelna lian World Cup anga practice match nei ṭha loa khelh chu suangtuah thiam a har," tiin a sawi.

Neuer-a'n competitive match a khelh hun tur a la sawi thei lo nachung hian, Germany general manager Oliver Bierhoff chuan an keeper hi a rei thei ang ber an nghah tur thu a lo sawi tawh.

1996 European Championship final-a chakna goal khungtu Bierhoff chuan, "Manuel hi World Cup-ah a inlan ngei ka ring a, chumi tur chuan a rilru pawh a hmin bawk. June 4 thleng player 23 awmna squad thehluh theihna hun kan nei a, a fit hman ngei kan beisei," tiin a sawi.

Tuna a lan dan chuan Neuer hian inbuatsaihna ṭha nei lo chung chuan World Cup khelh luih kher a duh lo niin a ngaih theih. Chutih rualin May 19-a Bayern Munich leh Eintracht Frankfurt ten German Cup final an khelh tur chu a inlan theih hun tura ngaih a ni a, June 2-a Germany leh Austria ten friendly match an khelh tur chu fiahna hnuhnung a ni bawk ang.

Germany head coach Joachim Low-a'n May 15 hian provisional World Cup squad a puang dawn a, FIFA remruat dan angin June 4 hian player 23 awmna squad a puang ang–heng player te hi Germany tana Russia World Cup khel tur an ni tawh dawn a ni.