Newcastle an hausa hnai!

Saudi Arabia Public Investment Fund (PIF) chuan Newcastle United an lei thei dawn hnai ta - he thuziak i chhiar meuh chuan Magpies hian neitu thar an nei tawh hial mai thei.

Magpies hi PIF leh an thawhpuite hian pound maktaduai 300-in an lei thei dawn a, an hausakna nena ngaihtuah chuan Newcastle hi European football-a club langsar pawl ni tura din an tum ngei ang.

Saudi Public Investment Fund (PIF) hian club leina 80% chu an tum dawn a, a bak hi an thawhpui PCP Capital Partners leh Reuben brothers ten an tum tur a ni thung - club neitu pathum an awm dawn tihna a ni.

April 2020 khan Saudi PIF, PCP Capital Partners leh Reuben brothers te hian Newcastle hi lei turin inremna an lo neihpui tawh a, mahse, Premier League hnenah Newcastle enkawl tur chungchanga insawifiahna an neih theih loh avangin thla li hnuah an inhnukdawk.

Saudi PIF hlutna hi dollar tluklehdingawn 500 bawr vel nia sawi a ni a, Reuben brothers hian dollar tluklehdingawn 16 an nei a, PCP Capital Partners neitu Amanda Staveley hian dollar maktaduai 130 chuang a nei bawk.

Nikum lama PIF leh an thawhpuiten Newcastle lei an tum khan beIN Sports chuan Saudi Arabia chu a ruka an rama beoutQ channel kaltlanga Premier League pe chhuakah an puh.

BeIN Sports hi middle-east lama Premier League pe chhuaktu an ni a, anni hian middle-east lama English top flight pekchhuah nan hian pound maktaduai 400 an seng. Hei vang hian an tan chuan Saudi sorkar enkawl anga ngaih PIF-in Premier League club an lei thei tur hi a huatthlala hle.

Hei chauh a ni lo - mihring dikna chanvo humhalh kawnga pawl lar tak Amnesty International chuan Saudi Arabia-ah mimal zalenna rahbehna a nasat avangin Saudi PIF-in Newcastle an lei tur hi an duh loh thu an lo sawi ve tawh bawk.

Heng thil hrang hrang avangte hian Newcastle United lei tumna hi PIF leh an thawhpuiten thlentir tum viau mah se a thleng lawk thei lo a, tunah erawh inremna neih fel theih a ni ta.

Saudi sorkar hian tun hnai lawkah khan beIN Sports nen Premier League pekchhuah chungchangah inremna an nei a, Premier League thuneitute hnenah PIF chu Saudi sorkar thuhnuaia awm tur a nih loh thu Magpies lei tum sumdawngte hian an sawi a, hei vang hian Newcastle hi an lei thei dawn ta a ni.

Newcastle United Supporters' Trust chuan Thawhlehni khan fan-te ngaihdan la khawmin 93% chuan an club hralh hi an duh a, kum 14 zet club neitu ni tawh Mike Ashley mangṭha thuai thuai an châk.