Kohli kaihhruai RCB-in hun ṭha bawhpelh

Indian Premier League khelh mekah Royal Challengers Bangalore chuan qualifier 1 khelh theihna hun ṭha an bawhpelh a, Nilaini zan khan table mawngphaha awm Sunrisers Hyderabad chu run liin an hneh lo.

Zanin hian league round khelh zawh a ni dawn. Delhi Capitals, Chennai Super Kings leh Bangalore ten playoff an lut tawh. Nizan inkhelah Kolkata Knight Riders-in Rajasthan Royals an hneh a nih chuan zanina inlan tur Mumbai Indians tan semifinal inlan turin thilmak a thlen a ṭul ang.

Chak a pawimawh
IPL-ah hian team pariat an awm a, a sang paliin playoff an khel dawn. Qualifier 1-ah pakhatna leh pahnihna an inkhel ang a, heta chak zawk hian final an lut nghal dawn. Eliminator round-ah pathumna leh palina an inkhel ang a, heta chak zawk hian qualifier 1-a chak lo zawk nen final khel tur an zawng ang.

Royal Challengers Bangalore tan qualifier 1 khel thei turin Sunrisers Hyderabad an hneh ngei a ṭul a, an elpui Chennai Super Kings aia an Net Run Rate a chhiat zawk avangin chiang taka chak an mamawh bawk. Kohli hoten an dinhmun an hria a, chak ngei pawh an tum. Amaherawhchu Sunrisers hian New Zealand captain Kane Williamson hnuaia khel an ni.

Run li chauh
Sheikh Zayed Stadium-ah Virat Kohli-a'n vawm hmasak a thlang. Sunrisers-in Jason Roy (44) leh Williamson (31) te hmangin 141/7 runs an siam a, chak tur a la hriat loh. Bangalore tan target umphak theih awm tak ni mah se rin ang ngawt a ni lo.

Captain Kohli-a'n bul rawn ṭan mah se 5 runs chauh a siam a, Devdutt Padikkal (41) leh Glenn Maxwell (40) te chet ṭhat zarah chak an beisei zel. Ball 12 a la awmin 17 runs siam a la ngai a, chak theih la ni mah se over 18-ah Jason Roy-a'n 5 runs chauh a pek bakah wicket khat a la, over tawp bera vawmtu Bhuvneshwar Kumar-a'n over tawp berah 8 runs chauh rawn pe ve lehin RCB-in over 20-ah 137/6 runs an siam. Sunrisers 4 runs in an chak.

Engtin zel?
Nizan khan Chennai Super Kings leh Punjab Kings te an inkhel a, CSK hi an chak lo ta pawh ni se pahnihnaah an awm chiang tawh. Qualifier 1 hi October 10, Pathianni zan dar 7:30-ah khelh a ni dawn a, Chennai leh Delhi Capitals te an inkhel ang.

Eliminator hi October 11, Thawhṭanni zan dar 7:30-ah an khel thung dawn. Nizan inkhelah KKR-in Rajasthan Royals an hneh a nih chuan eliminator-ah hian Royal Challengers Bangalore nen an inhmachhawn ang.