Thutlukna dik a ni - Lionel Messi
Lionel Messi chuan Paris Saint-Germain a pan chu thutlukna dik a nih thu a sawi. France Football magazine zawhna chhangin Messi chuan, "PSG ka zawm hi tihsual ka neih ka hre lo," tiin a sawi.
Barcelona fa chuam, a duh leh engkim tihsak ṭhintu club nen Messi hi an inṭhen a ni a, football khawvel a nghawr nghing a nih kha. A vanglai pelh tawh lamah Paris khawpui pan chauh ni mah se, a thawm erawh mitdelte hriat tham khawpa ring a la ni reng.
Rin loh takin thil a thleng thut a nih kha. Messi an lakluh tirh khan Paris St-Germain chuan an website-ah Messi hming chuanna jersey 150,000 an zuar chhuak a, minute sarih chhungin an hralh zo vek! Khawvel puma PSG fans neih dan chhut chuan turu tak a ni - Messi a nih vang erawhin a mak lem lo.
Paris a pan...
Messi hian naupang mai a la nih laiin Barcelona a zawm, kum 13 mi chauh a la ni. Tunah chuan Messi hi kum 34 mi a ni tawh a, nupui fanu neiin chhungkua a din tawh - chona thar hmachhawn nan chuan a tlai tawh mah mah ti ila a sual lo mai thei.
Messi-a'n Paris khawpui a tlawh hnuhnung chu December, 2019 kha a ni a, a zin chhan chu a vawi ruk nana Ballon d'Or a dawn vang a ni - kum hnih hnu velah Paris a pan leh a, tunah chuan Paris club tana khel turin a ni ta.
Nipui lai khan Neymar-a'n season li daih contract a ziak thar a, fans an lawm hle. August thla a lo thleng a, beisei phak loh Messi an lalut thut mai chu PSG fans lawmin awm ngaihna an hre lo - a thlen hma ni aṭangin airport chhehvelah an inhawr khawm tuau tuau tawh mai a ni.
PSG player ṭhenkhat chu Ander Herrera inah an inhmukhawm, hetah hian Messi-a lo dawnsawn dan tur an rel! Club a zawm tirh aṭangin player dangten an lo dawngsawng ṭha a, a bul hnaia awm phak nih chu intih theih nan tak an hmang emaw ni tih mai tur a ni hial.
Barcelona tana a khelh lai chuan a hmelma lian ber chu Real Madrid an ni. Real defender ropui chu Sergio Ramos a ni thung - Ramos nen hian vawi tam an inhmachhawn tawh, tunah chuan club pakhatah an awm dun ta. Ramos meuh pawhin Messi hi duhsakna nen a lo lawm.
Number 10
Player tinin jersey number hak duh leh hak chak bik an nei a, a bik takin number 10 chu tun hma aṭanga mite ngaihven leh dahsan a ni ṭhin. Barcelona tana a khelh lai pawhin Messi chu number 10 hatu a ni.
PSG a pan a, number 10 chu Neymar hak lai a ni. Brazilian forward hian Barca tana a lo khelhpui tawh Messi hi phal takin jersey number 10 a lo kian nia maw le! Mahse maw, pa inngaitlawm ve tak Messi hian a haksak duh lo.
Messi hian a ṭhianpa jersey hak lai chhuhsak ai chuan number 30 a thlang. Number 30 hi Barcelona tana match hmasa ber a khelh ṭuma a hak a ni a, tunah chuan Catalan club hnua team dang a zawm lehna hmasa berah pawh a ha zui leh hi a mak lo hle.
A ṭhianpa tana Neymar inpekna hi a fakawm, jersey chauh a ni lo. Barcelona tana an khelh dun lai ang khan Messi hi tlarhma laiah a khel duh a nih chuan Neymar hi mual veilam sira awm a hreh lo, a ṭhianpa ni bawk tana a inpekna hi a sang hle a ni.
Messi tan Neymar a inphah hniam hreh lo a, hei vang hian coach Mauricio Pochettino tan pawh player remkhawm a awlsam phah ngei ang tih a chiang. Anni pahnih bakah Kylian Mbappe chu a sir leh laiah a khelh chhawk kual tir thei dawn.
An lo lawm
PSG training a zawm hmasak berin Messi hi gym-ah a lut a, hmanraw hman dan tur lo kawhhmuhtu chu Sebastiano Pochettino a ni. Messi chuan mak a ti hle, a hmuh hnuhnun ber lai chuan Sebastiano hi naupang mai a la ni, tunah chuan hnathawktu ṭha tak a lo ni tawh.
Barcelona lamah chuan training-na thil leh hmanrua te chu Messi tan thil thar a ni lo, a ta ang mai a ni. Mahse, club thar a neih takah chuan engkim mai chu a bul aṭanga ṭan ṭhat a ngai ve tho a, inthlahrun hmel taka a thil ti vel chuan a ṭhiante lawm a hlawh hle.
Tleirawl thaza leh mahni induhtawk ve tak Mbappe pawhin Messi hi lawm takin a lo pawm. A dinhmun ṭha leh sang tam tak chu a rawn chhuhsak dawn tih a hrechiang ngei ang, mahse khawvela player ropui bera mi tam takin an ngaih khelhpui hi player dang pawhin an châk a ni.
English thiam lo Messi hi Mbappe-a'n Spanish ṭawngin a lo dawngsawng thei a, hei hian mak tih a hlawh. Marco Verratti hi a hmel en ang ngawt a ni lo. Italy international hi fiamthu duh leh ṭhiante tihlim thei tak a ni a, ani pawhin Messi lawmna thu a sawi ve bawk.
Barcelona chauh ni loin La Liga thlengin Messi chhuak tur hi an ui, ui taka an chhuah hi Paris khawpui bakah Ligue 1 chuan lawm takin an lo dawng thung si. Messi awm avangin PSG leh Ligue 1 lamin ngaihven a hlawh zual hi French football tan chuan chanchin ṭha a ni.
Messi tan
Barcelona chu Messi tan an khel, tih a ni ṭhin. Khawvela club ropui berte zinga mi thunun thei tur chuan player ṭha chungchuang bik nih a ngai - a club tharah pawh Messi hi an vul dawn tih a chiang, match a khelh ve tawhna thlir chuan amahah mawhphurna a sang hle.
August 29 khan Reims lakah a match hmasa ber a khel a, hnai takah rang zet zeta ball inpek kual chu Messi thiam dan a ni a, manager Pochettino pawhin hetiang dung zui hian a naute a khelhtir ve nghal.
Manchester City nen an inhmachhawn ṭum erawhin ball chang tam lo zawk mah se counter attack an hmang. Messi chu Mbappe hnungah zalenna zau zawk pek a ni a, a hmaa forward tlan chak sut kuakah Messi hian a duh ang thalin ball a sem kual thei.
Le Parc des Princes bika a match hmasa berah Messi hian Lyon a hmachhawn a, inkhel zawh hmain thlak a ni. Messi hi a lungawi lo, amah lo enkawl tawh ṭhintu Pep Guardiola hian, "Messi chuan thlak a duh ngai lo," tiin a lo sawi tawh, a dikzia kan hmu.
A kum tam deuh tawh mah se club tan a theihna zawng zawng hman zawh a la duh. Mahse, manager Poch-a'n Messi hi a khup hliam vanga thlak a nih thu a sawi, a thusawi dikzia nemngheh nan an match khelh lehpekah Messi hi a inlan thei lo, tunah erawh harsatna nei loin a khel thei leh tawh.
Duhlai Antonela
Barcelona khawpuia inbengbel tawh ni mah se Paris-ah chuan mikhual an ni a, chhenna tur in pawh an la nei lo. Mahse, engtik lai pawha phatsan ngai lotu leh hmangaihtu Antonela Roccuzzo chu a kiangah a awm reng a, lungngaihna tur a awm lo.
Messi leh Antonela te hi kum nga mi lek an nih laia inhre tawh an ni, Antonela-i hi Messi-a naupan laia a ṭhian ṭha ber Lucas Scaglia-a cousin a ni. An inkawmngeih a, hun harsa leh hlimawm tam tak an tawng dun tawh, tunah chuan fa pathum neiin chhungkaw hlim tak an ni mek.
PSG zawm tura thu a tih tluk pawhin Messi hian a nupui Antonela hnenah a hrilh hmasa a, ani hian a pasal chu 100%-in a thlawp nghal thlap; a nupui leh fate a hrilh hnuah Paris an pan a, khualkhuaah pawh khawhar hre loin an awm.
Chenna in la lei chiah lo mah se hotel awm manah an buai lo. Paris khawpuia hotel langsar tak Le Royal Monceau-ah an awm, zan khat an awm man hi Rs 17,30,120 a ni daih a, tun hma pawhin Neymar-a'n thlen nana a lo hman tawh a ni.
Sum tam tak hlawh a, nun nuam taka hman kha Messi-a'n PSG a pan chhan erawh a ni lo. Club neitu lamin an awh ngawih ngawih Champions League nomawi chawi pui a tum dawn a, hunin a la hril ang.
Mimal Chawimawina
Ballon d'Or/FIFA Ballon d'Or (6): 2009, 2010, 2011, 2012, 2015, 2019
FIFA World Player of the Year: 2009
The Best FIFA Men's Player: 2019
European Golden Shoe (6): 2009–10, 2011–12, 2012–13, 2016–17, 2017–18, 2018–19
FIFA World Cup Golden Ball: 2014
La Liga Best Player (6): 2008–09, 2009–10, 2010–11, 2011–12, 2012–13, 2014–15
Argentine Footballer of the Year (12): 2005, 2007, 2008, 2009, 2010, 2011, 2012, 2013, 2015, 2016, 2017, 2019
Laureus World Sportsman of the Year: 2020
Ballon d'Or Dream Team: 2020