Spain-in phuba an la, Italy record a tawp

UEFA Nations League final thleng turin Spain-in European champion Italy 2-1 in an hneh. La Roja goal hnih hi Manchester City forward Ferran Torres khung ve ve a ni a, Luis Enrique hote hian Euro 2020 semifinal-a an hneh loh Azzurri lakah phuba an la.

Robert Mancini hote hian world record siamin match 37 hneh loh an tawng lo a, an record kaltluang hi Spain-in an tihtawpsak. Final hi October 10, Pathianni zan dar 12:15 hian San Siro-ah khelh a ni ang a, Spain hian nizana Belgium leh France inkhela a chak zawk an hmachhawn ang.

A danglam hret
Euro 2020 semifinal kha kumin July 6 khan khelh a ni a, thla thum hnuah erawh inkhel bul ṭantute an dang tawh. Italy-in tlarhmaa an rinrawl Ciro Immobile inhliam vangin an chhawr thei lo a, Lorenzo Insigne leh Federico Chiesa te kawppui turin Federico Bernardeschi a awm.

Midfield erawh Marco Verratti, Jorginho leh Nicolò Barella te tho an ni. Tlarhnungah captain Giorgio Chiellini chu bench-ah awmin Leonardo Bonucci kawppui turin Alessandro Bastoni te an awm. Mual sira awm Giovanni Di Lorenzo leh Emerson bakah keeper Gianluigi Donnarumma te an la ngai vek.

Spain tlarhnungah pawh Euro squad-a tel pha lo Marcos Alonso-a'n bul a rawn ṭan a; Aymeric Laporte-a'n Eric Garcia aiah Pau Torres kawppuiin Cesar Azpilicueta-a'n bul a ṭan bawk. Enrique-a'n goalkeeper-ah Unai Simon bawk a ring.

Midfield-ah Pedri-a'n bul ṭan lo mah se Barcelona rawlthar duhawm Gavi a hmang. Gavi hi kum 17 mi niin Pedri aiin a la naupang zawk a, Sergio Busquets leh Koke te nen an inkawp. Tlarhma pathum chu Ferran Torres, Mikel Oyarzabal leh Pablo Sarabia te an ni a, Dani Olmo squad-ah a awm lo.

Hei le, Torres
San Siro-ah mualneitu Italy-in chance ṭha an nei hmasa zawk a, Chiesa-a'n an chance ṭha neih hmasak chu goal-ah ṭha takin pet mah se keeper Simon-a'n a dansak. Spain erawhin an chance ṭha goal-ah an chantir nghal a, vei lam aṭanga Oyarzabal-a cross ṭha zet chu Ferran Torres-a'n minute 17-naah goal atan a chantir.

Spain wing back Alonso-a'n minute hnih hnuah goal-ah petin Donarumma-a'n man pialin goal ban a per a, Bonucci-a'n a pet chhuak hman. Italy an insiamrem a, Di Lorenzo-a'n tauh goal theihna turah goal zawnah a tauh lo.

Napoli captain Insigne-a'n Emerson hnen aṭangin ball ṭha a hmu a, Euro laia Italy star hian keeper Simon chauh hmachhawn mah se goal zawnah a pet lo. Spain erawhin an chance ṭha neih goal-ah an chantir a, Oyarzabal-a cross bawk chu Torres-a'n ṭha zetin a tauh goal. Spain-in goal khungtu Torres an nei a, Manchester City pawh an lawm ang.

Danglamna red card
Spain-in inkhel an thunun a, Italy-in minute 42-naa captain Bonucci hnawhchhuah an tuar bawk. Juventus defender hian inkhelh ṭantirh lamah referee laka a lungawi lohna a lantir nasat avangin yellow card pek a ni a, first half tawp hma hian ṭul lo takin Busquets a nghawk lui a, yellow card vawi hnihna a hmu.

Roberto Mancini-a'n a naute fuih nan halftime hmang ṭha mah se an tlem zawk miau avangin an tho chhuak zo lo. Second half ṭan chiahah Chiesa-a'n goal ban a pet per a, minute 83-naah counter attack aṭanga nawr letin Italy hian siphurh an sut ṭhen.

Azzurri goal hi substitute Lorenzo Pellegrini khung a ni a, Chiesa thawhrah liau liau a tih theih. Juventus forward hian Spain player in pass sual chu nangchingin ṭha takin a khalh lut a, keeper chiah a hmachhawn hnuah Pellegrini hi a pass.

Spain tan subsitute Yeremi Pino a che ṭha a, Villarreal winger hian chance ṭha bik ṭum hnih rawn siam mah se Oyarzabal leh Alonso ten goal-ah an chantir thei lo. La Roja hi an phu angin 2-1 in an chak.

Nations League
• UEFA hnuaiah ram inelna pahnih Euro C'ship leh Nations League a awm. Nations League hi kum 2018 aṭanga khelh ṭan a ni a, ram inkhelin ngaihven a hlawh theih nana friendly match tam zawk thlak nana tih a ni.
• Nations League-ah hian UEFA hnuaiah ram 55 chu league pali - League A, B, C leh D-ah ṭhen hran an ni.
• Inelna hmasa ber League Phase hi September 6 – November 20, 2018-ah khelh a ni a, Nations League Finals hi June 5-9, 2019 chhung khan an khel. Finals hi League A group pali zinga ti ṭha palite chauhin an khel thei a, Portugal an champion. Netherlands, England leh Switzerland ten finals hi an thleng.
• Tun ṭum Nations League hi a vawi hnihna a ni a, league phase hi September 3 – November 18, 2020 khan khelh a ni. Finals (playoff) hi October 6 aṭang khan khelh ṭan a ni a, Italy, Belgium, France leh Spain te chu finals khel pha chin an ni.

Hnehna chan hi a lawmawm a, final kan thlen avangin a lawmawm zual. Chutihrualin Italy-in min hmachhawn hmaa an record siam hi a ropui ka ti. Zing lamah chuan chanchinbu ka chhiar dawn lo. Inkhel report ka chhiar dawn lo a, keimahin ka inzir ang a, insiamṭhatna tur pahnih vel chu ka hria. Gavi, Yeremi leh Ferran te kha an khel ṭha em em a, mahse kan player naupang te chauh kha che ṭha an ni lo. Marcos Alonso kha a che ṭha em em a ni. Tute pawh kha an khel ṭha a, sawiselna tur ka nei lo. - Luis Enrique, Spain

Spain hian ball an chang tam ṭhin a, player 11 pawhin khelh an harsa. Chuvangin player 10-a khelhpui an har dan tur chu kan hriatthiam tlan ka ring. - Roberto Mancini, Italy

Nations League
Semifinal
October 6, Nilaini zan
Italy 1 - 2 Spain
ITA : Lorenzo Pellegrini 83'
SPA : Ferran Torres 17', 45+2'
Nizan Inkhel - Result kan hre hman lo
Belgium Vs France

October 10, Pathianni
Third Place
Italy 06:30 PM Belgium/France

Final
Spain 12:15 AM Belgium/France