Wildcard dawn pawiti lo Murray

A dinhmunin a zir lo a, duhthlan tur dang a nei ngang si lo. Andy Murray chuan tournament buatsaihtu lamin wildcard an pe ṭhin chu lawm taka a dawn mai zel a ngai tih a sawi a, player dangte chanvo laksakah a inngai lem lo.

Britain tlangval hi a vanglai chuan world number 1 ni thei a ni, inelna hmachhawn turin duhsak bik a ngai lo. Mahse, hliamin a tibuai a, a inkhelh tam loh miau avangin a ranking a hniam, qualifier khelh ngai loin tournament siamtu ṭhenkhat chuan wildcard an lo pe ṭhin.

Grand Slam vawi thum champion tawh Murray chuan, "Season thum chhung vel chu mite duhsak ngai khawpin ka awm ta. Mi ten wildcard ka mamawh chhan an hria, player naupang zawkte chanpual deuh nia ngaih ni mah se, ka inlan ve theihna tur a nih chuan lawm taka ka pawm mai a ngai," tiin a sawi.

Wildcard hi tournament buatsaihtu lamin an duhsak zawng an pe thei. Ranking hniam si, mahse inelna hmachhawn ngei tura an duh an pe ṭhin a, khawtual mi bakah inelna an buatsaih tawha sulhnu nei ṭhate an pe tlangpui.

Indian Wells Masters khelh mekah Murray hi wildcard pek a ni a, ani bakah hian hmeichhe wolrd number 1 hlui Kim Clijsters leh US Open champion thar Emma Raducanu te an pe bawk.