Barca pan vanga inchhir lo Depay

Netherlands international Memphis Depay chuan Barcelona chu hun thim an tawn lai taka zawm ni mah se inchhirna a neih loh thu a sawi a, Catalan club a zawm avanga a inchhir leh inchhir loh zawttu journalist chu, "Engtinnge hetiang zawhnate min zawh theih zawk?" tiin a chhanglet!

Kum 27 mi Depay hian nipui transfer lai khan free transfer-in Barcelona hi a zawm a, mahse, Catalan club hian Lionel Messi leh Antoine Griezmann chu an sum dinhmun harsat avangin an chân zui a, an leiba hi euro tluklehdingawn 1.4 bawr vel a ni mek.

Hei chauh a ni lo - khelmual chhungah pawh result duhawm an nei thei lo. Inelna hrang hranga an match hnuhnung parukah vawi khat chiah an chak a, league-ah pakuana dinhmun luah mekin, Champions League-a an group-ah a mawngphah an luah bawk.

Mahse, Depay chuan, "Ka khelh mekna hi Barcelona a ni a, he club lenzia hi in hrethiam phak lo niin a lang. Player tan Barcelona ang club liana luh hlutzia hi in hrethiam lo a ni mai thei a, engtikahmah ka inchhir ngai lo ang," a ti.

Kum 27 mi Depay hian Barcelona tan inelna hrang hrangah match kua khelin goal thum a khung tawh a, assist vawi khat a nei tawh bawk.

Tunah erawh international break hmangin Netherlands squad-ah a awm mek a, Dutch team hian zanin dar 12:15-ah World Cup qualifier khel turin Latvia an lenchilh dawn. March thlaa an intawn hmasakin 2-0 in an lo hneh tawh.

Manchester United boss hlui Louis van Gaal enkawlna hnuaia khel mek Netherlands hian group G-ah match ruk khelin vawi li hnehna an chang tawh a, point 13 neiin hma an hruai mek.

Zanina an hmachhawn tur Latvia hi match ruka point nga nei tawh team an ni a, player langsar an neih loh bawk avangin Dutch team tan chak turin harsatna a awm lo tura ngaih a ni.

Chutihrualin pahnihnaa awm Norway-in point 13 an hmu ve bawk a, zanin dar 12:15 hian pathumna Turkey an hmachhawn dawn. Norway hian an striker rinrawl Erling Braut Haaland chu hliam vangin an chhawr thei dawn lo.