Irving a training thei lo

NBA All-Star zinga vawi sarih tel tawh Kyrie Irving chuan Brooklyn Nets training a zawm thei lo, inbuatsaihna a neih theih loh chhan hi coronavirus laka invenna (vaccine) a lak loh vang a ni.

NBA chuan player zawng zawng hi vaccine la turin a nawr lui lo. Mahse, khawpui thuneitu ṭhenkhat chuan an khawpui chhunga inkhel tur chuan vaccine lak ngei a ngai an ti thung.

Irving-a khelhna Nets hi New York khawpuia awm niin, New York bakah San Francisco khawpui thuneitu lam chuan basketball chauh ni loin infiamna dangah pawh inelna hmachhawn tur chu invenna la ngei turin an ti.

Nets coach Steve Nash chuan, "Kyrie lamah kan ṭang, engtik niah emaw chuan inkaihhruaina dan pawh an la siam danglam mai thei, chumi hunah pawh a lamah kan ṭang zel ang," tiin a player thutlukna siam chu an pawmpui thu a sawi.