Goal khung lo India tan beisei a tlem ta
Match hmasa bera Bangladesh an inhnehtawkpui hnuin India chuan goal khung loin team tenau Sri Lanka an inhnehtawkpui a, SAFF Championship-ah final luh beiseina a tlem ta hle.
Blue Tigers-in match hnih an khelh tawhah hnehna an chan zawh loh avangin point hnih chiah an nei a, team inel panga zinga a sang pahnihin final an khelh dawn avangin India tan final lut tur chuan match hnuhnung pahnihah chak ve ve a ṭul dawn.
India-in Sri Lanka an inhnehtawkpui avangin Stimac-a dinhmun a nghet lo ta sawt tiin a sawi theih a, Croatian coach hian SAFF-ah thilmak thlentirin India hi champion pui pawh ni se a hna hi a hum kher lo mai thei–India khelh danah lawmna tur a tlem tlat!
Duhthlanna mak
Igor Stimac-a hnuaia India result avangin Croatian coach-in sawisel a hlawh a, mahse, kum 54 mi coach hian, "Social media-in India coach turah thutlukna a siam loh ka beisei," tiin India fan-te a kap zui.
Fans tam takin lungawi lo sain India inkhel an thlir a, Croatia coach starting XI-in mipui a barakhaih nghal. Tlarhnung laiah Chinglensana Singh te dah tur an awm chungin full back pahnih Rahul Bheke leh Subhasish Bose te a dah mauh a, Bangladesh laka Bheke khelh dan hmu tan phei chuan thil mak a ni.
Stimac hian 4-2-3-1 hmangin tlarhmaah Sunil Chhetri a maltlat tir a, Suresh Singh Wangjam chu midfield-a Glan Martins kawppui turin bul a ṭantir a, mual sir aṭanga goal nawrpui tura a dah Liston Colaco leh Udanta Singh hi Bangladesh laka hmuh tur awm lo kha an ni a, Stimac-a duhthlanna a mak.
Inkhel chu
India-in inkhel ṭantir aṭangin ball an chang tam zawk a, mahse, Bangladesh nena an inkhel ang thoin chance insiam an harsat a, tlarhmaa 'supply' dawng ṭha tawk lo Chhetri-a'n tih theih a nei tlem a, inkhelh pahin a naute fuih ṭhin mah se danglamna a awm hleithei lo.
Udanta Singh ball siamsak aṭangin Colaco chuan India tan chance nei mah se holam takin goal-ah a chantir lo a, Indian Super League lama Indian player 'hot' pawl tan hian Blue Tigers jersey hak chu a la rit hret em ni aw, tih mai tur a ni.
Stimac-a'n hun tawp hnaih tawh lamah goal khung beiseiin Farukh Choudhary leh Manvir Singh te luhtir mah se goal an keng tel bik lo a, team tenau Sri Lanka laka goal khung loin draw result-ah India-in lungawi an zir–Sri Lanka hi ram 210 awmna FIFA ranking-ah 205-na an ni a, India hi 107-na an ni thung.
A chhehvel
India squad-ah Lalengmawia (Apuia) chu Mizo awmchhun a ni a, Bangladesh laka bench aṭanga luhtir midfielder hian bench lamah hun a hmang tluan–ISL player man to ber tan India jersey ha turin hmun a awm lo.
India coach Igor Stimac chu mual sirah a ṭang lutuk hret a, referee-in Blue Tigers coach hi a nungchang mawi loh avangin yellow card a pe hial.
Hun pek belhah India tan Subhasish Bose chuan goal khungna remchang a nei a, mahse, ATK Mohun Bagan defender hian Blue Tigers tana hming chher hunah hnai set sawt aṭangin a hlah–uiawm tak a ni.