Huddersfield an him; Chelsea dinhmun a chhia

Premier League a ngaihnawm zel–Huddersfield Town chuan Nilaini zan khan 1-1 in Chelsea an inhnehtawkpui a, season tharah Premier League an khelh chhunzawm dawn tih a chiang ta.

Hetihlai hian Chelsea dinhmun ṭha lo sa erawh a ṭhat lo belh – season hmasa Premier League champion tan season thara Champions League khel tur chuan an match tawp bera Newcastle United an hneh a, Liverpool-in Brighton & Hove Albion an hneh loh a ṭul bawk ang.

Tottenham Hotspur-in Harry Kane goal khung hmangin Magpies chu 1-0 in an hneh a, season tharah Champions League an khel dawn chiang ta–Spurs tana match tawp ber pawimawhna chu qualifier pumpelh tura Liverpool chunga awm chauh a ni tawh.

‘Kan him ta’
Stamford Bridge-ah, “Kan him ta,” tiin Huddersfield fan-te zai thawm a ri dual dual a, beisei loh zawk team chu minute 90 hnua hlim zawk an ni – Chelsea fan-te erawhin ngawi rengin stadium an chhuahsan a, season thara Champions League khel turin beiseina a tlem tawh tih an hai lo.

Blues hian an khelmualah an khel chhia a ni hran lo a, goal hmaa an hriam tawk lohna chu an vanduaina thlentu a ni. Antonio Rudiger-a’n vawi hnih ngawt chance ṭha nei mah se goal-ah a chantir thei lo a, Andreas Christensen-a tauh goal ngei tur nia lang chu Huddersfield goalkeeper Jonas Lossl chuan ṭha zetin a dan sak bawk.

First half-ah Huddersfield-in shot nei miah lo mah se minute 50-naa an chance neihchhun erawh Laurent Depoitre-a’n London club barakhaih nan a khung. Chelsea-in an si phurh sut tur pawhin vanneihna an mamawh tel–Mathias Jorgensen ball petchhuah turin Marcos Alonso hmaiah tak a fuh a, goal-ah a lut!

Fak phu Wagner
Tla thei dinhmuna ding Huddersfield-in season tawpa an match hnuhnung pathumah Manchester City, Chelsea leh Arsenal an nei a, Championship aṭanga inpetkai club hian season tharah Premier League an khelh chhunzawm a rinawm lo.

Mahse, manager David Wagner-a’n fing takin game plan a nei a, City lakah tlarhnungah inhnawhkhawmin tun season champion an ti beidawng. Chelsea lakah pawh German coach hian him turin point khat a tawk tih a hria a, tlarhnungah phui taka inremin thutlukna dik a siam.

Borussia Dortmund-a Jurgen Klopp hnuaia thawk ṭhin manager chuan, “Team danga innghat miah loin kan him a, keimahni thawhrah liau liau a ni. Tumahin kan him an ring lo a, keini erawhin beiseina kan nei tlat a ni,” a ti.

Mangṭha Conte
Premier League club zingah manager ‘ren’ lo ziak dawn ta ila, Chelsea-in tlarhmasa an luah ngei ang – season thara Champions League khel turin dinhmun chhe takah an awm ta a, Antonio Conte dinhmun a him lo.

Italian manager hian Stamford Bridge-ah kum khat dang atan contract a la nei a, mahse club kutah engkim a innghah thu a sawi tawh! Juventus boss hlui chuan, “Match khat khelh tur kan la nei a, FA Cup final a la awm bawk. Thutlukna dik chu club-in a siam mai ang,” a ti.

Conte-a’n Champions League khel turin beiseina an nei tlem tawh tih a hai lo a, chhuanlam a zawng lo. Conte chuan, “Point kan hloh hnem a, a ruh langa sawi chuan kan awmna hi kan phu tawk a ni. Table-ah pangana dinhmun kan luah chuan kan phu tawk tihna a ni mai,” tiin a sawi.

CL khel tur Spurs
Tottenham Hotspur tan Harry Kane chuan minute 50-naah goal awmchhun a khung a, 1-0 a Newcastle United an hneh avangin Champions League an khel dawn. Kane-a’n goal a khung rualin a khelh danah erawh lawmna tur a tam lo.

English striker hian first half-ah ho zetin a volley out a, holam taka ball hloh a nei bawk. Spurs manager Mauricio Pochettino pawhin Kane-a’n tun hnaiah beisei a phak lo tih a hai lo a, “World Cup-ah erawh a ṭhat dan berin a khel hman ang,” tiin England fan-te a thlamuan.

Pochettino chuan Champions League an khel tur chu a lawm thu sawi nghalin, “An hnathawh ṭhat avangin kan player te kan lawmpui tur a ni a, Champions League khel tura kan tling leh ta hi hnathawh ropui bik a ni a, season tharah stadium thara Champions League kan khel tur hi ka lawm takzet a ni,” a ti a, a phur hle.