A tawpna tur a ni lo – Djokovic

Novak Djokovic chu Kyle Edmund hneh loin Madrid Open third round aṭangin a tla a, world number 1 hlui hian beisei ang result nei lo mah se Britain tlangval laka a tlawmna chu a tawpna tur a nih loh thu a sawi.

Nilaini zan inkhelah Djokovic hi darkar khat leh minute 40 chhungin 6-3, 2-6, 6-3 in Edmund lakah a chak lo a, Serbian tlangval hi vawi hnih a champion tawhna hmunah beisei phak loin a zinkawng a tawp.

Grand Slam vawi 12 champion tawh Djokovic chuan, "A nihna takah chuan tournament khelha hma taka tlak hi chu a lungngaih thlak hle. Chutih rualin tun hnaia ka inkhel nena khaikhin chuan hmasawnna a awm a, ka lawm tho. Tun hi ka tawpna tur a ni lo a, he infiamna huangah hian kum tam tak ka lo hlawhtling tawh a, ka tawpsan lo ang.

"Tennis khel tur hian tumahin min tur lui lo a, kiu na vangin buai ṭhin mah ila he game hi ka ngainata, ka hmangaih em avangin ka rawn kir leh zel a ni," a ti. Djokovic hian French Open inbuatsaih nan Italian Open khelh tur a la nei, 2016 hnuah Grand Slam bikah quarterfinal a la paltlang loh avangin hmasawn a ngai hle.

Inkhel dangah world number 1 Rafael Nadal chuan Gael Monfils lakah 6-3, 6-1 in hnehna a chang a, Spain tlangval hian a vawi ruk nan Madrid Open nomawi chawi a tumna a chhawm nung zel.

Grand Slam vawi 16 champion tawh Nadal chuan clay-a a kaltluang chu a lawm thu a sawi a, chutihrualin a elpui ni ṭhin Djokovic chu ṭha taka a rawn kir leh a duhsak thu a sawi bawk. Nadal chuan, "Novak hian zawimuangin hma a sawn a, a theihna san zia ka hriat chian avangin player hlauhawm berte zingah a tel leh ngei ang tih ka chiang," tiin a sawi.