Manchester City-in record an siam zel

Manchester City chuan Nilaini zan khan Brighton & Hove Albion chu 3-1 in an hneh.

Etihad Stadium-ah City-in goal thum an khung a, point thum an hmuh bawk avangin point 97 an hmu a, goal 105 bakah vawi 31 an chak a, heng pathum hi Premier League record vek a ni.

City an chak
Pep Guardiola chuan Huddersfield nen an inhnehtawk ṭuma bul ṭantu zing aṭangin player pariat a thlak a; Leroy Sane, Fernandinho leh Gabriel Jesus te chiahin bul an ṭan nawn.

Season thara chhuak mai tur Yaya Toure chuan Eithad Stadium-a City tana a inlan hnuhnun ber turah hian captain armband a hreng a. City tan hian Danilo (16'), Bernardo Silva (34') leh Fernandinho (72') ten goal khat ṭheuh an khung a, Brighton tan Leonardo Ulloa chuan ni 1467 hnuah a goal hmasa ber a khung ve bawk.

Yaya an chawimawi
Hun tawp hnuah Kolo Toure chu khelmualah a rawn chhuak a, ani hi City tan 2009-2013 season chhung khan a khel tawh. Kolo chuan a unaupa chu City kawr 'Yaya Toure–316' tih inziak chuanna 'frame' thlap leh lifetime season ticket a hlan.

Ivorian midfielder hi City tan vawi 316 a inlan a, goal 82 a khung. City defender Vincent Kompany chuan, "City hian legend a nei a nih chuan Yaya ngei hi a ni a, dressing room leh khelmualah mi ṭha tak a ni a, a hunah tak a inlan ṭhin.

“ 2011 FA Cup semifinal v United

– Yaya.

“ 2011 FA Cup final v Stoke

– Yaya

“ Kum 2012-a Newcastle nena inkhel pawimawhah – Yaya goal hnih

“ Kum 2014-a Crystal Palace nena inkhel pawimawhah

– Yaya

“ 2014 League Cup final v Sunderland – Yaya

“ 2016 League Cup final v Liverpool – Yaya penalty." tiin a khelhpui Yaya Toure chu a fak.