Milan hnehin Juve-in nomawi chawi
Juventus chuan AC Milan 4-0 a sawp chungin Coppa Italia nomawi an chawi a, Italian club-te knockout hmanga inelnaah Bianconeri hi a zawna season li chhung an champion-na chiah a ni nghal bawk.
Nilaini zan inkhelah Juventus tan defender Medhi Benatia-a'n goal hnih a khung inkarah Douglas Costa chuan goal khat a thawh ve a, an goal hnuhnung ber hi Nikola Kalinic-a'n anmahni lama a tih luh a ni thung. Massimiliano Allegri naute hian tun season Coppa Italia bikah goal chhuah miah loin nomawi an chawi thei a ni.
Juve an lian
Stadio Olimpico, Rome-ah Juventus chu rinkai zawk an ni a, chutihrualin hun chanve hmasa lam chu goal awm loin an inhnehtawk. Second half-ah erawh team ṭha zawk a lang chhuak a, a khat mawi tawkin a goal deuh reng.
Minute 56-naah Benatia chuan Aegentine forward Paulo Dybala-a corner pet a tauh lut a, Milan goalkeeper Gianluigi Donnarumma-a'n a dan theih ngei tura ngaih Douglas Costa pet chu a chum chhuak zo lo.
Gennaro Gattuso naute an insiamrem hman meuh lo a, Turin club-in an nawr nat em avangin Milan keeper a rim hle. Corner-ah bawk an buai, striker Mario Mandzukic-a ball tauh Donnarumma-a'n dan sak mah se a per chu Benatia bawkin hnai tak aṭangin a khung. Goal hnih an chhuah pah tawhna corner aṭanga ball rawn kal bawk chu Nikola Kalinic-a'n anmahni lamah a ti lut palh a ni.
Juventus hi Italian Cup-a vawi 13 an champion-na chiah a ni a, anni aia champion hnem an awm ta lo. Chak lo zawk Milan tan erawh kum sarih chhunga an nomawi chawi teuh ber ṭum a ni a, hlawhtlinna chang tur chuan season thar an nghah leh rih a ngai dawn.
Allegri a lawm
Massimiliano Allegri-a'n season li chhungin Juventus chu nomawi pariat a chawipui ta a, Pathianni zana an khingpui tur AS Roma lakah point khat lek pawh an hmuh belh a nih chuan Serie A champion an ni zui dawn bawk; league-ah bik a zawna a vawi sarihna tur a ni ang.
Juventus manager Allegri chuan, "Juventus chanchin chu kan ziak danglam chho leh ta. Ka nauten thiamna sang tak an lantir a, an rilru a huaisen bawk avangin chak zawk nih kha kan phu a ni. Fans lam tan pawh zan hriatreng tlak leh hriatreng tur a ni bawk ang.
"Kan khingpui AC Milan hnathawh ṭhat kha kan hmuh hmaih lo, a bik takin first half chhung bik kha chuan an tlarhnung a phuiin min chhaih buai hle. Amaherawhchu, dawhthei takin kan nghak a, second half-ah kan tan kawng a rawn inhawng ta a ni," tiin a sawi. Arsenal nena sawi zawm lai manager hian a hma hun an zawhna chu, "Champion lawm hun a ni a, hma hun sawi hun a ni lo," tiin a chhang thung.
A la tawp lo
Chak lo zawkah ṭang mah se Gennaro Gattuso a tlawm lo a, season tharah a ṭha zawka an kir leh tur thu a sawi. Gattuso hian nikum kum tawp lam aṭangin a club hlui hi a enkawl a, tun season tawp ruala a contract tawp tur chu pawh sei niin a enkawl zui dawn.
Final thlir kirin Gattuso chuan, "Football hi chu a mak a ni, kan result hian kan inkhel kha a hrilhfiah lo, mahse kan tihsual chu kan tuar si. Minute 56 hmalam kha chuan Mario Mandzukic-a'n ball vawi khat a tauh tih mai loh kha chu hlauhawm pawh kan tawng lo," tiin a sawi.
Italian manager chuan sawi zawmin, "Coach tawnhriat ngah lo tak ka la ni a, tihsual leh thutlukna siam fuh loh chu ka nei thei. Kan hun tawn aṭangin kan in en let ang a, kan ṭhat tawk lohna lai siam ṭhain season tharah chuan team hlauhawm zawk kan nih ngei ka beisei," a ti.
Coppa Italia champion chu nise Europa League khel turin an tling nghal dawn. Mahse, Milan an chak loh avangin league lamah hmasawn an ngai dawn tihna a ni. Serie A table-a parukna nilai hian league match pahnih khelh tur an la nei a, Pathianni zanah Atalanta an tlawh ang.