LeBron hmachhawn tur Celtics

Boston Celtics chuan nimin zing khan Philadelphia 76ers chu game 5-ah 114-112 in an hneh a, 4-1 a series lain Eastern Conference finals an lut. Celtics hian Pathianni zan dar 1:00 hian LeBron James-a telna Cleveland Cavaliers nen Conference finals game 1 an khel ang.

Western Conference finals game 1 chu Thawhlehni zing dar 6:30-ah khelh a ni dawn a, regular season-a pakhatna Houston Rockets leh champion lai Golden State Warriors te an inhmachhawn dawn.

A hmuhnawm
TD Garden-ah Celtics leh Sixers ten inkhel hmuhnawm an chhawp chhuak a, an inum chho char char. Halftime-ah Celtics-in 61-52 in hma hruai mah se third quarter zawh chuan 83-82 chauh a ni leh tawh a, fourth quarter-ah chuan hma an inhruai chhawk.

Second 2.4 chiah a awm tawh tihin Celtic-in point khatin hma an hruai a, Marcus Smart chuan freethrow pahniha a hmasa zawk hlah mah se a pahnihna lutin 114-112 in hma an hruai chiah.

Smart hi tlan let leh nghalin Sixers guard Ben Simmons-a'n inbound aṭanga a vawmluh chu a dang leh hman a, team tana a inpekna hi Celtics chak theihna chhan pakhat a ni.

Celtics guard Jaylen Brown chuan, "Kha kha Smart-a chet ṭhin dan a ni a, freethrow hlah mah se steal nei leh hmasa ber chu a mah a ni. Team tan engkim a hlan a, inhliam a hlau ve lo," tiin a khelhpui a fak.

Che ṭha dang
Game 5-ah hian Sixers tan Dario Saric leh Joel Embiid ten point 27 ve ve an nei a, player pahnih hian rebound-ah double digit nei pha ve vein double-double an nei ve ve tihna a ni.

Amaherawhchu Celtics thawhhona a ṭha a, an player hming langsar Kyrie Irving leh Gordon Hayward te awm lo chungin conference final an thleng. Jaylen Brown chuan point 24 a nei a, Jayson Tatum-a'n point 25 neiin Terry Rozier (17 pts), Al Horford (15), Aron Baynes (13) leh Marcus Smart (14) ten point 10 an nei tling ve bawk.

Hmabak
Celtics hian nikum khan Eastern Conference final hi an thleng tawh a, Lebron James-a telna Cleveland Cavaliers lakah 1-4 in an chak lo.

Tun ṭumah hian Cavaliers player pawimawh Irving lalut tawh mah se inhliam vangin an chhawr thei dawn lo a, hming langsar dang Hayward a la awm dawn loh bawk avangin chak turin thawhhona ṭha a pawimawh ang.