India nulate inringtawk

Hockey tournament pakhat Asian Champions Trophy chu May 13 aṭang­in Donghae City, South Korea-ah khelh a ni dawn a, India defender Sunita Lakra chuan inrin­tawkna an neih thu a sawi.

Mizo nula Lalrem­siami telna India team hian group match-ah China, Malaysia leh a thlengtu Korea an hmachhawn dawn a, knockout round lut tur chuan an hna a hautak dawn hle.

India defender Sunita Lakra chuan, "Season hmasa khan Asia Cup kan chawi a, tun ṭumah pawh inrintawkna kan nei ang. Commonwealth Games-ah medal la phak lo mah ila tun ṭumah chuan beiseina kan nei sang," a ti.

Hliam leh harsatna dang vangin India hian captain Rani, forward Poo­nam Rani leh de­fender Sushila Chanu te cn chhawr thei dawn lo a, chuti chung chuan beiseina an nei lian hle.

Lakra chuan, "Kan team hian tun hnaiah Aus­tralia leh England te pawh kan elphak a, kan inkhel tawk hle. Kan khingpui turte pawh kan zirchiang tawh, an chak lohna thuruk kan hriat tawh avangin World Cup leh Asian Games tana inbuatsaihna ṭha a ni bawk ang," tiin a sawi.