Nations League final-ah Spain Vs France

UEFA Nations League final chu October 10, Pathianni zan dar 12:15 hian San Siro, Milan-ah khelh a ni dawn a, Spain leh France ten nomawi an inchuh dawn. Pathianni zan dar 6:30-ah pathumna zawn a ni dawn a, inelna thlengtu Italy leh Belgium an inhmachhawn ang.

Nations League hi friendly match u awrh ang chauh ni mah se ram inelna pakhat a nih ve miau avangin ngaihven en liam mai theih a ni lo. Semifinal-ah pawh inkhel entute thawm a ṭha a, boruak pawh a ṭang.

Final-a inhmachhawn tur Spain leh France hi football thiam ram ve ve an ni a, player a neih ṭhat bakah coach ṭha Luis Enrique leh Didier Deschamps ten an enkawl. La Roja hian Euro 2012 hnuah nomawi chawi an tum.

Enrique naute hi Euro 2020-a mi nen khan inang thuak mah se Alvaro Morata leh Gerard Moreno te an tel lo a, player langsar pahnih awm loh hi a hriat loh. Player tel thar Chelsea defender Marcos Alonso, kum 17 mi Gavi, kum 18 mi Yeremi Pino leh kum 20 mi Bryan Gil te an che ṭha.

Spain hian ball an chang tam ṭhin a, France lakah pawh inkhel thuntu zawk an nih rinawm mah se chak tur zawk erawh hriatthiam har. Les Bleus hian tlarhmaah Karim Benzema, Kylian Mbappe leh Antoine Griezmann te an tlar thei a, an chhuanawm tham hle.

Midfielder ṭha mi N'Golo Kante a tel thei lo a, Adrien Rabiot-a'n Chelsea midfielder hmunruak a luah. France hian Belgium lakah goal chhuah mah se bench-ah chhawr loin PSG defender Presnel Kimpembe leh Bayern defender Dayot Upamecano te an dah thei a, tlarhnung lam pawh an ṭha tih a chiang.

Belgium lakah France an 'comeback'
France-in UEFA Nations League final lut turin FIFA ranking-a number 1 Belgium 3-2 in an hneh. San Siro-a inkhel hmuhnawm bikah hian Red Devils-in Yannick Carrasco leh Romelu Lukaku te hmangin goal hnih an khung hmasa a, Les Bleus-in Karim Benzema, Kylian Mbappe leh Theo Hernandez te goal hmangin an lehthal.

Ningani zan inkhel hi a nung ṭha hle. Belgium-in bul an ṭan ṭha a, Kevin de Bruyne-a'n a chance ṭha neih chu goal-ah pet mah se Hugo Lloris-a'n ṭha zetin a dang. Red Devils an khel ṭha zawk a, Carrasco-a'n minute 37-naah ṭha zetin a khung. Chelsea striker Lukaku-a'n minute 40-naah angle zim tak aṭangin a khung leh a, first half-ah 2-0 a ni.

Second half-ah Didier Deschamps a kaihhruai France an insiamṭha a, goal hmaah hlauhawm nghalin Antoine Griezmann-a'n chance ṭha hmasa hlah mah se Benzema hmangin minute 62-naah siphurh an sut. Real Madrid forward hian Mbappe hnen aṭanga a ball chu box chhungah virpuiin mawi zetin a pet goal.

Belgian midfileder Youri Tielemans-a'n ṭul loah Griezmanna ti tlu a, VAR hman hnuah penalty pek niin Euro 2020-a penalty hlahtu Mbappe-a'n cool takin a khung. France-in minute 69-naah siphurh an sut fel a, inkhel pawh a nung sawt.

Minute thum chauh a awm tawh tihin Lukaku chuan vei lam aṭanga Carrasco cross chu goal-ah a chantir a, Belgium-in chak turah an inngai. Mahse, VAR hman hnuah pawm a ni lo. Minute 90-naah AC Milan left back Theo Hernández chuan chakna goal a khung a, Belgium tan siphurh sutna hun a awm tawh lo.