India tan chak a ngai

SAFF Championship vawi 13-naah sulhnu nei ṭha ber India chu tla thei dinhmunah an ding. Pathianni zan dar 9:00 hian Blue Tigers-in National Football Stadium, Male-ah Nepal an hmachhawn dawn a, champion beiseina chhi nung turin chak ngei an mamawh.

Croatian coach Igor Stimac hnuaiah India-in result ṭha neih an harsat a, tun ṭum inelnaah pawh hian Bangladesh leh Sri Lanka (1-1) nen an inhnehtawk ve ve. India squad-ah Lalengmawia (Apuia) chiah Mizo a awm a, Vaivakawn tlangval hi Bangladesh an hmachhawn ṭumin minute 59-naah bench aṭanga luhtir a ni a, Sri Lanka lakah a inlan lo.

Blue Tigers hian India tana goal khung tam ber Sunil Chhetri la kawl mah se an goal bawh a na lo.

Stimac hote (FIFA ranking 107-na) hi pali-naah an awm mek. An chunga awm Nepal (168), Bangladesh (189) leh inelna thlengtu Maldives (158) te hi FIFA ranking-ah 150 chunglama awm vek an ni a, final an thleng lo a nih chuan mualphona a ni ang.

India hian September thla khan Pathiani zana an khingpu tur Nepal nen hian ṭum hnih ngawt friendly match an nei a, match hmasa zawkah 1-1 a inhnehtawkin match hnuhnung zawkah 2-1 in an hneh hram.

Tun hnaia an inkhelh tawhna thlirin hi Blue Tigers hi chak chiangsaa dah a rem lo a, inkhel inhnehtawk tak hmuh a beisei theih ang.