Mi hausa tawntaw kutah Newcastle

Manchetser City leh Chelsea neitute hausak zia kan hria, player lei nan sum pawh an ren lo - an mit it zawng apiang an hlah lo a ni ber. Mahse, tunah zet chuan English club pahnih neitute hausakna hi belhkhawm tehreng pawh ni se Newcastle United neitute lakah chuan engmah lo mai an ni!

Saudi Public Investment Fund chuan Newcastle chu pound maktaduai 305-in an lei fel ta. Saudi Arabia lal fapa Mohammed bin Salman telna PIF hian Magpies-ah hian neitu nihna 80% an nei a, kum 14 zet neitu lo ni tawh Mike Ashley hnen aṭangin neitu nihna an lei chhawng.

Indawrna hi hun rei tak chhung neih a ni thawh a, tih khawtlai ni mah se Premier League chuan, " Premier League, Newcastle United Football Club leh St James Holdings Limited te chu PIF, PCP Capital Partners leh RB Sports & Media kutah a lut fel," tiin thu an chhuah.

Club leh PIF hian nikum April thla khan inrem lailawkna an nei daih tawh. Mahse, thuneitu tur chungchangah hian Premier League lam duhdan nen a inmil mai thei lo a, tunah chuan EPL leh club bakah a neitu tur lam duhdan angin thil a kal thei dawn ta a ni.

English club hlun an ni a, amaherawhchu nomawi an chawi hnuhnun ber chu 1955 FA Cup daih tawh kha a ni. Magpies striker hlui Alan Shearer chuan, "Beiseina kan nei leh ta," tiin twitter lamah a ziak - hlawhtlinna nei tura an indin thar tur chu a lawm hle.

Shearer chuan, "Fans hi an rinawm takzet, football an hmangaih a, an nun chu Newcastle United hi a ni. An hmela hlimna lo lang chhuak kha hmuh a nuam, kum 14 chhung lawmna nei tawh lo ten hlimna an nei ve leh ta. Ni chhinchhiah tlak a ni," tiin a sawi.

Magpies legend Shearer hian St James' Park-ah kum 10 zet hun a hmang a, goal 206 zet a khungsak. A sang zual pali zingah a inhlankai pui fo a, ṭum thum chu Champions League a khelhpui - a club hmangaih takin sum leh pai tam tak a nei ta chu thinlung takin a pawmpui tih a lang.

Neitu thar an neih hnuah Newcastle hian tunge an lei ang, manager atan tunge an rawih ang? tih chu football tuimite titi a ni chhunzawm nghal. Manager ṭanglai Steve Bruce chuan a hna chhunzawm theih ngei a duh.

Bruce chuan, "Ka hna hi thawh chhunzawm ka duh, dan pangngai ang chuan club neitu thar hian manager thar an duh ṭhin. Chutih rualin a neitu tharte hian eng chen nge ka thlen pui theih tih min fiah se ka duh," tiin ban inring tak chung siin Magpies enkawl chhunzawm a châk thu a sawi.

Newcastle-in neitu thar an neih angin kalphung thar an nei dawn a, club neitu tharte hi manager Bruce leh club captain Jamaal Lascelles te nen an inbe tawh. Ram tana khel tura zinte rawn let hunah (karleh Zirtawpni) an inhmu khawm leh ang. Newcastle United Supporters' Trust-in zirchianna a neihah Bruce ban duhtu hi 94% an awm a, table-ah 19-naah an awm mek avangin an ban mai hi a rinawm zawk.

Magpies manager thar tura sawi rik zingah Rangers manager Steven Gerrard, Chelsea manager hlui Frank Lampard bakah Inter Milan, Juventus leh Chelsea enkawl tawhtu Antonio Conte hming a ri a, boruak a lian nghal hle.