Fury vs Wilder III: A hun a thleng dawn ta
Inrinni zan, keini lam sanaa Pathianni zingah Tyson Fury leh Deontay Wilder te chu a vawi thum nan an intawng leh dawn ta a, WBC heavyweight title inchuha boxer pahnih intawng leh tur hi boxing ngainatu tan chuan nghahhlelh loh chi rual a ni lo.
Boxer pahnih hian press conference pawh an hmachhawn zo tawh a, an inngam tawn siah siah hle. Media an hmachhawn hnuhnung berah Fury chuan a khingpui tur Wilder chu boxing chawlhsan mai turin thurawn a pe.
Fury hi hmanni lawka 'atomic bomb' tia Wilder faktu kha a ni a, a tharlam berah erawh a nuihzat leh viau lawi si. British boxer chuan, "Wilder, i nihna tak i hai a, ka knockout dawn che a ni. I tana ṭha turin thutlukna siam la, boxing hi chawlhsan mai rawh, i hmingṭhatna chu derthawng takin a awm mek hi," a ti!
Hello Vegas
Las Vegas khawpuiah boxer pahnih hi a vawi thum nan an inhnek dawn a, inhnek hmasa berah inhnehtawkin a vawi thumnaah erawh Wilder a tlawm a, WBC heavyweight title a kawl lai chu a chân phah - neih let leh châkin a tuihal ang.
Mahse, Fury-a'n Wilder a hlau lo a, hneh leh ngei a inring tlat. Kum 33 mi boxer chuan, "Chhuanlam i neih ṭhin zawng zawng chu thai bo a ni tawh a, pa chak lo ve tak mai chauh i ni e," tiin Wilder hi a ṭawng khum a, US-a inhnek tur mah ni se chak a tumruh hle.
Wilder chuan, "Ka ropuizia tilang turin eng dang nge ka mamawh tawh chuan? Fury, chutiang chuan i sawi ve thei em. Mihring hlauthawng ve tak chauh i ni," a ti a, a khingpui tur a dim bik lo hle.
Hna hlauhawm
Wilder chuan, "Ka chhungte leh ka fate pawhin hna hlauhawm tak ka thawk tih hi an hre vek a, boxing anga nunna la hnem infiamna hi a awm ngai lo," a ti a, infiamna hlauhawm takah pawh rei tak a dinchan thu a sawi - Fury a hlauh loh hmel hle.
American fighter hian a coach Mark Breland chu Fury a ngam loh hnu lawk khan a ban a, kum 2014-a a lo knockout tawh hnu, Malik Scott chu coach thar atan a la a, beiseina a nei sang.
Kum 35 mi Wilder-a'n beiseina a nei sang lehzual ta a, "Hmanah khan ka coach-ah lo ruat tawh ila ka tifuh zawk ang," tiin a coach thar hi a lo fak tawh a, a tifuh zawk dawn leh dawn loh chu kan hre thuai dawn e.
Chhuanlam
Boxer pahnih an inhmachhawn hnuhnung bera a tlawm khan Wilder-a'n chhuanlam a zawng nasa a, a chhuanlam zingah Fury-a'n a glove a tih danglam thute, 'ring-walk' neih laia a kawr hak rit lutuk avanga a chauh thute a tel!
Hei vang hian Fury-a'n Wilder hi "Mi chak lo" tiin a sawi a, Wilder erawh a thusawiah a ding tlat. American boxer chuan, "Ka thahrui hi ka suangtuahna ang mai a ni a, a dingchang ṭhin. Ka thusawiah khan ka inchhir lo a, ka rin tawh chu ring tlat chungin ka thlan khur ka pan dawn a ni," a ti!
British boxer rorum Fury chuan, "A thusawite khan keimahah nghawng a nei lo - mi pakhat, chiang vak loin a sawi a nih vang a ni. Engkimah min puh a, a team, trainer, a suit hak, inhliam, Athletic State Commission of Nevada leh referee thlengin a puh vel vek. Chhuanlam pakhat chauh nei se chuan a awihawm ve deuh tur a nia! A chhuanlam zawng zawngin min hrilh langsar tak chu mi chak lo tak, Inrinni zana ka knockout tur a ni, tih hi a ni," a ti a, a cho hle.
A chhehvel
Boxer pahnih inhnekna tur hmun hi T-Mobile Arena a ni a, Paradise, Nevada, U.S-a awm hmunah hian mipui 20,000 chuang an leng - Wilder leh Fury an intawn hunah thawm a rin loh ring suh. A ring dawn tho tho!
Tuna mipui hmuh châk chu Fury leh Anthony Joshua inhnek a ni a, mahse, chumi thleng tur chuan Fury hian Wilder a hneh phawt a ṭul a, Joshua-a'n a kawnghren chhuhsaktu Oleksandr Usyk a hneh ve leh a ngai bawk - a awlsam lo a, kawng a la thui hle.
Fury-a'n a career-ah tlawm a la nei lo tih hre ran chungin ring chhung a lut ang a, Wilder hneh nawn tura ṭha tawkah a inngai dawn - hei tak hi hmuhnawm tur chu a ni a, India-ah chuan Pathianni zing dar 6:30 aṭangin inhnek a awm ṭan ang a, Voot Select-ah en theih a ni ang.