Ka nun a tibuai lo - Verstappen

October thla chhunga a vawi khat nan Formula 1 an tlan leh tawh dawn. Pathianni tlai dar 5:30 hian Istanbul Park-ah Turkish Grand Prix an tlan ang - champion tura rinkai Max Verstappen chuan boruak sang mah se a buai loh thu a sawi.

F1 champion lai Lewis Hamilton leh Red Bull driver Verstappen te an inel tawk hle a, season dang zawng aiin champion tur pawh rin thiam a harsa zawk emawni tih mai tur a ni hial.

Kum 24 mi Max chuan, "Kei leh ka team chuan champion ngei kan duh a, kan tum ruh hle bawk. Chutih rualin mihring lamin kan tih theih chin tawka sang a awm, chumi piah lam thunun tum chu thil atthlak mai a ni ang.

"Inelna a san avangin mi tam tak chuan chiai mai turah min ngai a ni mai thei, car intlansiakna huangah hian tawnhriat ka nei ve nual tawh a, chu vangin ka nun phung ti buai leh khaihlak khawp thil a ni bik lem lo," tiin a sawi.

Dutch driver Verstap-pen-a'n a chunga awm Hamilton a phak lohna chu point hnih lek a ni a, intlansiak pakhatah an dinhmun a la inthlak danglam hlawk thei. Tun season kal laiah inbakkaih an neih zauh zauh tawh avangin an chanchin hian ngaihven a hlawh zual.

Red Bull driver chuan sawi zawmin, "Kei chuan intlansiak hi nuam ka ti a, lungngaihna tur a awm lo. Season tawpah tunge sang ber dawn tih kan la hre lo, kei chuan nuam ti taka inelna neih hi ka duh dan a ni," a ti.

Media lamin Max-a hi chhaih buai tum viau ṭhin mah se tun dinhmunah chuan a buai duh lo. F1 champion vawi hnih ni tawh Fernando Alonso pawhin Verstappen chu puitling a tih thu leh, boruak leng vel vanga a buai phah loh thu a sawi tawh a ni.