Hneh nei loin Clijsters a tla

Hmeichhe tennis world number 1 hlui Kim Clijsters chu Indian Wells Masters-ah hneh nei loin a tla. Clijsters hi duhsak takin wildcard pek ni mah se, nimin zing inkhelah Katerina Siniakova chu 6-1, 2-6, 6-2 in a ngam lo.

Clijsters hi a vanglai chuan khawvelah a ṭha berte zinga mi a ni. Mahse, ṭum hnih ngawt tennis a chawlhsan tawh, tunah lo kir leh mah se beisei a phak thei tawh lo - hliam bakah fa neih vanga a inkhelh loh rei avangin ngaiawh a harsat.

Grand Slam vawi li champion tawh hi kar hmasa khan Chicago Fall Tennis Classic-ah a inlan a, hetah pawh hian a match hmasa berah a chak lo. Tournament a khelh hnuhnung pahnihah hneh nei loin a tla tihna a ni.

Kum 38 mi Clijsters chuan, "Chicago lama inelna ka hmachhawn khan ka khel chhe loin ka hria, mahse ka chak lo. Tun ṭumah chuan set hmasa berah ka che fuh tawk lo a, a hnu lamah thawh leh beiseina nei mah ila a harsa tawh.

"Hnehna chang lo mah i la lawmna tur tam tak a awm, hrisel taka inkhelh theih hi a hlu a, tun season chhung ngei pawhin tournament dang ka la hmachhawn leh theih ka beisei," tiin a sawi.

Clijsters hnehtu Siniakova hian a match lehpekah chuan Angelique Kerber a hmachhawn ang. Seeded 10-na Kerber hi champion tura rinkai zinga mi a ni a, amaherawhchu tun season kal laiah result a neih ṭhat tawk loh avangin Siniakova tan beiseina a sang ang.