YAYYY P L

Indian Premier League vawi 14-na group stage inkhelh chhung/kar rei zet mai chu zawh fel a ni ta. Nizan lam result kan hriat kim hman loh avangin playoff-a inhmachhawn tur kan la hre kim lo.

Delhi Capitals chu league round-ah pakhatnaah an awm. Deredevils hming an put lai aṭangin India ram khawpui franchise Delhi Capitals hi team pangngai tak an ni a, season liam ta khan final-ah an irhfiak.

Dehli hi India captain hlui MS Dhoni hote chhim lampang palai Chennai Super Kings leh India captain nilai Virat Kohli kaihruai Bengaluru Royal Challengers te nen playoff an lut tawh.

He thu inchhiar meuh chuan hmunruak pakhat dang hi hnawh chhuah a ni tawh dawn. Ningani zan khan Shah Rukh Khan a team Kolkata Knight Riders-in dimna nei miah lova Rajasthan Royals an tuk zal a, palinaah awm ngei tura ngaih ni mah se chhiarkawp danin a la chiang lo.

Champion ngun ber Mukesh Ambani-a team Mumbai Indians-in nizan khan Sunrisers Hyderabad an hmachhawn a; thilmak dangdai, record chi tin reng an siam a, an bat hmasak ṭum a thlengte a nih chauhin playoff an thleng lo ang.

India to UAE
Hriat tawh angin kumin Ṭau thla aṭangin VIVO IPL 14-na hi India ramah khelh ṭan a ni a, team pariat awmin round 14 a awm. Group stage chu Ṭomir thla tahrik ni 2 khan India rama Covid-19 nasa taka a darh leh avangin chawlh lailawk a ngai ta a nih kha.

Chutah khawvela 'sporting body' hausa ber BCCI tan an sum hnar IPL zuzi mai tur chu en liam ngawt chi a ni lo. International schedule leh ICC calendar khat chho leh vek tawh si karah, inkhelh bang la awm leh hmabak awm te hlen turin BCCI in ruahmanna thar an duang leh a.

Kum 2014-a India inthlanpui avang leh kumhlui lama Covid-19 vang thoa hnehsawk taka lo thleng tawh UAE lam chu han ṭahawh leh ngawt maiin, hnehsawh takin tun dinhmun hi min thlenpui leh ta a.

Heng a tha leh zung seng, mi ṭangkai ber zingah hian IPL Governing Council a tel ve, Cricket Asst of Mizoram General secretary Mamon Majumdar a hming hi thalan tel a phu awm e. Tluang taka inelna neih a nih avagnin rawlkhawlhna awm loin IPL khawmpui chu kan ṭiak thei turah ngai ang.

UAE, kan lawm e
UAE lama khawpui pathum Dubai, Sharjah leh Abu Dhabi te chuan hnehsawh takin an thleng. Mahse, UAE hi ICC calendar a awm sa T20 World Cup thleng tur an ni a, khawvel huapa inelna lian thleng tur hian inpuahchahna an nei ṭan tawh. An stadium-a pitch-te chu hnim tam thei ang ber an ṭotir lai a ni a, hei hian inkhelah nghawng lian tak a nei.

Hnim an tan kawng lutuk chuan, World T20 lamah pitch phut leh hlui, game ti hmuhnawm lo a awm thei bawk si. IPL 14 khelh bang chu pitch hring deuh deuha khelh niin, thawk leh khatah India rama headlines luah lutuk lo, spinner te thlazar hnuaia awm, fast bowler ho an rawn langsar ṭan ta.

Kashmir lam rawlthar Umran Malik, Hyderabad Sunrisers tana khel chuan India bowler aṭanga kan hmuh ngai meuh loh 150 km/hr a kawhin ball a rawn vawm ta mai. Tin, a hma lama kanla hmelhriat lutuk loh Venkatesh Iyer te, Rituraj Gaikwad te tan tun UAE a inkhelh hi hming chherna hun lo inhawnna ni ta reng mai le.

Bul ṭan ṭhat
IPL 2021, chhumbung deuha chawlh lailawk, UAE lama bul ṭan that leh titih deuh chu a hmawr kan lo bawk dawn hnai ta reng mai. A tir te aṭanga bul ṭan ṭha team Delhi Capitals chu pakhatnaah an awm a, qualifier 1-a an khingpui tur a la chiang lo chungin Chennai Supers Kings ni turah a ngaih theih.

October 10, Pathianni zan dar 7:30 hian qualifier 1 hi khelh a ni dawn a, a hmuhnawm dawn. Nizan lama thil mak a thleng erawh chuan Delhi khingpui tur hi Royal Challengers Bangalore a ni thei bawk.

Eliminator round hi October 11, Thawhṭanni zan dar 7:30-ah khelh a ni dawn thung. Heta intum tur pawh hi la chiang lo mah se Bangalore leh Kolkata Knight Riders ni turah ngaih theih bawk. Qualifier 1-a chak zawk hian final an lut nghal dawn a, a chak lo zawk hi eliminator-a chak zawk nen final an khel ang.

Bul ṭan ṭhat hi chanve zo tluk a ni tih thufing kan hre vek. Amah-erawhchu he hringnun khelmualah pawh hian a aia la pawimawh zawk a awm? A tawp khar fuh hi a pawimawh zawk.

Season liam ta khan kumin group stage hmahruaitu Delhi Capitals hian a tawp khar fuh loh pawizia an tawng tawh. VIVO IPL 2021-ah hian ṭhangkhat lian zet a upa lo ni tawh Indian Premier League-ah zawhna pathum a awm.

Nomawi la ngai lo Delhi Capitals leh Royal Challengers Bangalore ten an hming an ziak kai ve tawh dawn nge? Chennai Super Kings ten a ṭum li nan hnehna hlado an chham leh dawn? Kolkata khawpui lamin a vawi thum nan Champion Parade an nei dawn?

A engpawh chu nise, tun kar tawp leh kar thar lo awm tur chho chu Inkhawmpui ṭiak tur vawrtawp cricket ngainatute tan hmaih phal chi a ni dawn lo. India rama kan hunpui ropui ber, Zofaten Puja tia kan hmelhriat ber Dussehra hun October 15 zan IPL final hun lo ni bawk nen. Tu team tak maw Puja fuh ang? I lo thlir ang!

- K. Vanlalruata