Brazil chak laiin Argentina chak zo lo
South America lama World Cup qualifier khelh laiah Brazil an kal fawr zel a, match kua an khelh tawhah an la chak vek. Tite-a naute hi chhiarkawp dan hmanga tling lo thei an la ni a, chutih rualin Qatar World Cup khel turin an tling tawh tia sawi ngam a ni.
Nimin zing inkhelah Brazil hian Venezuela lakah goal chhuah hmasa mah se 3-1 in an lehthal thei a, an hmahruaina an sawhnghet. Lionel Messi awmna Argentina erawhin goal an khung lo, an mikhualna ramah Paraguay nen goal awm loin an inhnehtawk.
Brazil 100%
Tite-a'n Brazil a enkawl tirha a thupui ber chu world champion nih a ni a, chumi nih tum chuan team a din. Player hrang hrang a ko kual a, Copa America meuh pawh World Cup in enchhinna ang hialah an ngai - an tum ber chu Qatar World Cup nomawi chawi a ni.
Qualifier aṭangin tihsual neih an duh lo. Mualneitu lamin Eric Ramirez hmangin minute 11-na lekah goal khung mah se, defender Marquinhos 71', Gabriel Barbosa 85' (P) leh Anthony 90+5' te hmangin an chhang let.
Manager Tite-a'n player a thlan zingah Leeds winger Raphinha a tel. Premier League lama hmuhnawm tak Raphinha hian Marquinhos a tauh luh tur a siamsak a, tlarhma lamah Venezuela tana hna hautak siamsaktu a ni fo bawk.
Raphinha chuan, "Tite khan Leeds tana ka khelh anga khel turin min ti, a duhthusam a ni phak lo a nih pawhin a lungawi ngei ka beisei. Ram tana match hmasa ber khelh chu a ropui a, awmdan tur pawh thiam a har," tiin a sawi a, match hmasa ber hi a dangin a zui ngei a rinawm.
Goal a lut lo
Argentina chuan ball chang tamin inkhel thunun viau mah se goal an khung thei lo a, point khatah an lungawi a ngai. World champion vawi hnih ni tawh hian Inter Milan striker Lautaro Martinez an chhawr lo a, goal hmaah an hriam tawk lo tih a lang.
La Albiceleste tana hun ṭha bera ngaih chu Joaquin Correa-a'n a ti hlawhtling thei lo. Lionel Messi chuan freekick aṭangin hun ṭha nei mah se goal bar hrulah a kal. Mualneitu lam tan Carlos Gonzalez chuan hun tawp dawnah chakna goal a khung teuh hle, mahse a vannei bik lo.
Copa America champion Argentina hian match kua aṭangin point 19 an nei tawh a, ram 10 inel zinga pahnihna dinhmun an luah - an chungah hian hmahruaitu Brazil chiah an awm; World Cup khel turin an dinhmun a ṭha tawh viau.
Lionel Scaloni naute hian tun international break chhung hian Uruguay leh Peru te an la hmachhawn leh dawn, khelh hmabak pahnihah hian point ruk an hmu thei a nih chuan Qatar pan turin fans lamin ticket an la ngam tawh ang.