Ranieri: Watford-ah hlawhtling tak ang maw?

Football khawvelah manager ngaih-nawm bik an awm ṭhin a, chutiang coach-ten game hmuhnawmna an belhchhah a, an kam liam ringawt changin journalist tam tak chuan an hun leh tha an seng ṭhin.

Chutianga manager hmuhnawm leh ngaihnawm bik zingah chuan Claudio Ranieri chhiar tel loh a harsa a, Leicester City tana hna ropui tak a thawh hma daih tawh khan he manager hi a lo ngaihnawm tawh ṭhin a, European football-ah zah a hlawh hle.

Chu coach chu Premier League-ah a lo kir leh dawn a, Watford enkawl turin kum hnih chhung atan contract a ziak. Italian coach hian a hna tur chu nomawi chawi lam a ni lo tih a chiang a, vantlang club-a a siam theih chuan Watford an lawm tawk ang.

Mahse, he club hi Premier League kai thar an ni a, coach ban lamah an kut a kal hle tih pawh hriat a ṭha - Ranieri hian eng ang danglamna nge a thlen theih ang tih chu zawhna awm a ni a, a chhanna pek a awlsam lo.

Coach ban awlsam
Watford neitu Pozzo chhungkua hian kum 2012 khan Premier League club hi an lei a, English club an lei hnuah hian coach thlak chu intihtheih nan an hmang emaw tih mai turin coach an thlak ngun!

Sean Dyche, Gianfranco Zola, Giuseppe Sannino, Oscar Garcia, Billy McKinlay, Slavisa Jokanovic, Quique Sanchez Flores (vawi hnih), Walter Mazzarri, Marco Silva, Javi Gracia, Nigel Pearson, Vladimir Ivic leh Xisco Munoz te chu coach atana an lakluh tawhte an ni a, vawi hnih ngawt coach lailawk hna chelhtu Hayden Mullins a la awm deuh deuh.

Ranieri thlak tak Xisco-a'n Watford hi thla 10 chhung a enkawl hman a, hetih chhung hian Championship aṭangin Premier League a hruai thleng hman. Mahse, top flight league match sarih an khelhah point sarih chiah an nei a, Spanish coach chungah zahngaihna an lantir lo.

Premier League-ah 2019-20 season ṭantir aṭang khan coach 12 chu an hna aṭanga chawlhtir an ni a, heng zinga coach pali chu Watford coach an ni - chutianga coach chunga zahngaihna awm lohna hmunah chuan Ranieri a rawn pen lut e!

Hmabak hautak
Kum 69 mi Ranieri hi mahni thu duh ve tak, a ṭul hunah chuan club neitute pawh khing mai ṭhin a ni a, he zia hi a la kalsan lo - Pozzo chhungkua nen hian an innel sa a, mahse, he inṭhianṭhatna hian rei tak a daih ang em, tih chu zawhna awm a ni.

Foxes coach hlui hian a match hmasa pariatah Liverpool, Everton, Southampton, Arsenal, Manchester United, Leicester City, Chelsea leh Manchester City a hmachhawn nghal dawn a, a harsa dawn tih inhrilh nawn a ngai lo.

Match riatnaa City an hmachhawn meuh hi chuan December a ni tawh dawn a, Krismas hmain Italian coach hian ban a tawk a nih pawhin mak tih lutuk tur a ni lo - Watford squad nena hneh tur chuan match riata a tum tur team te an ṭha hret a, club neitu lam lahin dawhtheihna aiin dawh theih lohna lam an intodelh zawk.

Hei erawh hriat a ṭha - Ranieri hi Leicester City hmanga Premier League champion ni thei a ni a, football-ah mi beisei loh thilmak a thleng thei tih hrechiangtu a ni a, chu beiseina nen chuan bul a ṭan ang.

Rinhlelhna & beiseina
Ranieri-a'n Foxes a chhuahsan hnuah Nantes, Fulham, AS Roma leh Sampdoria a enkawl leh tawh a, English football-a rawn kir tur a nih miau avangin Fulham-a a result hmangin tam takin an lo teh a, an ring lo.

Fulham-ah khan Ranieri hian match 17 chhung chu a team a kaihruai a, vawi thum chiah a team a chakpui - vawi thum draw result a nei a, vawi 11 a tlawm a, a win percentage hi 17.65% a ni.

Hei vang hian tam takin Ranieri chunga rinna an nghat ngam lo hi thilmak tia sawi vul chuk a rem lo. Chutihrual chuan Sampdoria lama a hnathawh thlirtute chuan Ranieri an ring ngam - hei hi Watford hmaa a club enkawl hnuhnung ber a ni a, hna a thawk ṭha.

Ranieri hian October 2019 khan Serie A club Sampdoria hi a zawm a, hetihlaia relegation zone-a awm team hi match khelh tur la awm chungin a himpui a, 15-na a nihpui. A season hnihnaah phei chuan player ṭha tam tak a chân chungin pakuana a nihpui a, mahse, club neitute nen an thu a inhmuh loh avangin tun season ṭan dawnah a chhuahsan.

A duh ber
English media leh fan ten Fulham-a a sulhnu avangin Ranieri rin an harsat a, mahse, Sampdoria-a a hnathawh hrechiangtu Italian club tam tak chuan an club enkawl turin an duh a, an sawm nasa hle.

Mahse, Italian football journalist lar Fabrizio Romano chuan, "Italian club tam takin duh mah se English football-in a lung a len a, Watford a thlang a ni," tiin a sawi a, Ranieri hian Fulham-a a hmingchhiatna kha Watford hmanga hliahkhuh a duh dawn.

Watford thuneitutena an duh ber chu an theihna ang taka khelhchhuah a ni ber a, Ranieri hna hmasa tur chu tlarhnung rem phui a ni ang - tun season league match sarih an khelh tawhah goal chhuah loh an la nei lo a, hei hi Ranieri-a'n a chinfel a ṭul dawn.

Chu chauh a ni lo. Tlarhmaah beiseina sang tak nena an thlir Ismaila Sarr te an theihna ang taka a chhawr thiam a ṭul dawn a, league match sarih chiaha goal sarih khungtu team hian goal tam zawk khung an duh. An beiseinate tihlawhtling turin Ranieri a ṭha tawk ang em? Hunin a hril ang chu.

Hming Claudio Ranieri
Pian ni leh thla 20 October 1951 (kum 69)
Pianna hmun Rome, Italy

Nomawi chawi tawh
Cagliari
Serie C1: 1988–89
Coppa Italia Serie C: 1988–89
Serie B promotion: 1989–90
Fiorentina
Serie B: 1993–94
Coppa Italia: 1995–96
Supercoppa Italiana: 1996
Valencia
Copa del Rey: 1998–99
UEFA Intertoto Cup: 1998
UEFA Super Cup: 2004
Monaco
Ligue 2: 2012–13
Leicester City
Premier League: 2015–16

Mimal Chawimawina
Premier League Manager of the Season: 2015–16
LMA Manager of the Year: 2016
Enzo Bearzot Award: 2016
Italian Football Hall of Fame: 2016
Gazzetta Sports Awards Coach of the Year: 2016
BBC Sports Personality of the Year Coach Award: 2016
European Coach of the Season: 2015–16
IFFHS World's Best Club Coach (Pathumna): 2016
Golden Foot: 2016, as football legend
The Best FIFA Men's Coach: 2016
World Soccer Magazine World Manager of the Year: 2016
Fiorentina Hall of Fame: 2018