Fury hmaah Wilder a tlu - Fury, i sang lua a ni e!

Boxing ropuina a la liam lo a, a hmuhnawmna a la nep lo - nimin khan British boxer Tyson Fury chuan heavyweight boxing-ah a aia ropui an awm lo tih pholangin Deontay Wilder chu round 11-naah a hnek tlu a, American fighter a tlawm chiang hle.

Boxer pahnih hi a hmain vawi hnih an lo intawng tawh - an intawn hmasa zawkah an inhnehtawk a, a hnuhnung zawkah Wilder a tlawm. American boxer hian chhuanlam tinreng a dap a, a thawmhnaw hak thlengin a sawisel!

Anthony Joshua hmachhawn tura inbuatsaih tawh Fury hi Wilder chuan court thupek hmangin a um zui a; British boxer Fury hian Wilder hmachhawn nawn leh loh chu duhthlan tur dang a nei lo - Wilder-a'n a ngam loh chalah chil a hnawm.

Las Vegas khawpuiah Fury-a'n chiang takin Wilder a knockout a, WBC heavyweight kawnghren a kawl lai chu a kawl chhunzawm leh ta - Wilder tan Fury a sang hret a, a cho nawn tawh kher lo ang!

Heavyweight boxing history-a inhnek hmuhnawm ber pawl a tling hial awm e.

Chhuanlam a bo ta
February 2020-a a vawi hnih nana boxer pahnih an intawn khan round sarihnaah Wilder a tlawm a, American fighter hian a chak loh chhanah thil tam tak a puh.

Fury chu a glove tidanglam angin a sawi a, ring a panna kawnga a thawmhnaw hak rit lutuk chuan a tihchauh thu a sawi bawk - khawvelin chhuanlam awma a ngaih loh thlengin chhuanlamah a hmang!

Niminah erawh Wilder hian ring a pannaah pawh thawmhnaw zang zawk a rawn ha tawh a, an vawi thum intawnnaah a vawi hnih nan a tlawm bawk avangin chhuanlam tur a awm tawh lo ang.

A tir lamah Wilder hian bul a ṭan ṭha viau a, a hnek nat vanga 'The Bronze Bomber' hming lem an pek hian Fury hi a hnek pawh a hnek tlu ngei a; nimahsela British boxer tuar a chhel a, a skills a san zawk bawk avangin a tawpah a chak.

Boxer ṭha ber
Fury-a'n Wilder a mut tir a, heavyweight boxing-ah ani aia boxer ṭha an awm loh thu a sawi zui - Anthony Joshua leh Oleksandr Usyk tan ngaihthlak nuam a ni hauh lo ang.

Kum 33 mi Fury chuan, "Tunlai khawvel heavyweight boxing-ah chuan champion ropui ber ka ni a, he thuah hian hnial tur a awm lo. Mei alh nena i infiam rei lutuk chuan a tawpah chuan a kang kai mai ang che," a ti zui a, Wilder-a'n a zuam sual thu a sawi.

Fury chuan, "Tawngpawng namnul mai mai theih ka ni lo tih ka pholang leh ta a, ka ṭhat dan berin ka khel lo a, mahse, a hunah tak ka rah ṭhin a ni. Wilder kha a tho leh ṭhin a, mahse, a tawpah chuan ka kut dinglam den kha a tuar zo ta lo a ni," a ti.

Fury-a promoter Bob Arum chuan, "Boxing khawvelah hian kum 57 chhung chu hun ka hmang ve ta a, hei ang renga inhnek hmuhnawm hi ka la thlir ngai lo," tiin fighter pahnih inhnek chu hmuhnawm a ti hle.

Eng nge an sawi?
Wilder hi sakeibaknei ang mai a ni a, ka dam chhungin a fan ka ni dawn. Fury pawh mi danglam bik a ni a, dam chhung atan a fan ka ni ta. A tir aṭanga a tawp thlenga inhnek hmuhnawm min hmuhtir avangin fighter pahnih chungah lawmthu ka sawi a ni. - Jorge Masvidal, UFC

Fight hmuhnawm tak a ni a, boxer pahnih inhmelmakna chu chinfel a ni ta. Heavyweight boxing a ngaihnawm takzet - hnehna a chan avangin Fury ka lawmpui a ni. - Lennox Lewis, Boxing legend

Fight hmuhnawm chungchuang a ni. Wilder a huaisen takzet a, mahse, a tan chuan Fury kha a lian hret a, a thiamin a chak em em bawk si a ni. - Chris Eubank Jr., Ex- WBO middleweight & super-middleweight champion

Fight ka en tawh azawnga hmuhnawm ber pawl a ni a, number 1 chu tlawm loin a kal zel e. Ka ṭhian leh champion ni bawk Fury ka lawmpui a, a fight a hmuhnawmin a ṭha takzet. Wilder-a huaisenna ka fak a, zanin chu fighter pahnihin ka thinlung an hneh hle. Slow-mo hmangin Fury hnek kha ka ennawn a, ka lu a hai thei hial mai. - Peter Quillin, ex-WBO middlewight champion

Fury vs Wilder III
Round 1
Wilder-a'n a kawnghren lak let ngei a tum tih pholangin Fury a rawn ngam viau a, British boxer dul lam a rawn bitum em ni chu aw, tih tur a ni. Round khatna tawp lamah Fury-a'n Wilder a hnek fuh a, mahse, a pumpui thlirin round khatna chu Wilder-a chanpual a ni.

Round 2
First round-ah Fury-a'n vawi riat chiah a hnek chhuak a, chung zinga vawi sarih chu round tawp lama a hnekchhuah a ni! Round hnihnaah British boxer hi a rawn insiamṭha a, Wilder-a'n inven hna a thawk ve thung.

Round 3
Wilder-a'n round khatna anga khelh lehnghal a tum tih a lang a, Fury-a hnek fuh avanga mipui thawm chu ring tak a ni. Mahse, British boxer-in a dawngtu ringawt nih a tum bik lo a, Wilder a hnek tlu! Mahse, American fighter a tho leh a, bell riin a chhanhim hram.

Round 4
Fury bawkin bul a ṭan ṭha a, mahse, rin loh lai takin Wilder-a kut dinglamin Fury a deng fuh a, British boxer tan tluk lohna chi a ni lo. Fury tho leh mah se a tlu nawn leh a, round lina chu Wilder-a chanpual a ni.

Round 5
Boxer pahnih an tlu ve ve tawh a, an chau tih hai rual a ni lo. Las Vegas mipuiten an ram mi Wilder ṭanin a hming an lam a, mahse, Wilder hian Fury-a kuttum a dawng fuh zawk.

Round 6
Fury-a'n a kut veilamin Wilder a hnek fuh a, boxer pahnihin a tlawm zawk nih duh loin an ti lui hram hram tih a lang a, thlirtu tan chuan mit a tlai!

Round 7
Fury-a'n Wilder-a kawnghren a chhuhsakna inhnekah khan round sarihnaah technical knockout hmangin a hneh a, tun ṭumah erawh Fury chungnung hret mah se thil danglam tak hmuh tur a awm lo.

Round 8
Fury-a'n corner-ah Wilder a nek chep a, a duhtawkin hnek chhuak mah se American boxer hi a tlu duh bik lo. Fury-a'n vawi 97 a hnek chhuak a, Wilder-a'n vawi 54 a hnek chhuak ve hram.

Round 9
Wilder a chau a, Fury-a'n chak beiseina a nei sang tulh tulh em ni chu aw, tih tur a ni thung. Round tawp lamah American boxer hian 'uppercut' nalh zetin Fury a hnek a, a phur phah sawt niin a lang.

Round 10
Boxer pahnih an chau tawh tih a hriat a, mahse, Fury-a'n mipui thawm reh lutuk tih harh nan Wilder a hnek tlu. Kum 35 mi Wilder a tho lehnghal a, Fury a hnek chhunzawm ve lehnghal - a hmuhnawm a ni!

Round 11
Fury-a'n uppercut hmangin chiang zetin Wilder a hnek fuh a, a kut dinglamin a deng zui. American boxer hian tluk loh hram tumin hrui a bawh a, mahse, Fury-a'n a hnek nawn avangin a tlu chiang - a tho leh tawh lo a, Fury chu WBC heavyweight champion a ni leh ta.