England an chak nuamsa

World Cup 2022 khelh tumin England-in kawng dik an zawh zel a, Inrinni zan khan World Cup qualifier-ah Andorra chu 5-0 ngawtin an sawp.

Three Lions tan hian Ben Chilwell, Bukayo Saka, Tammy Abraham, James Ward-Prowse leh Jack Grealish te chuan goal khat ṭheuh an khung a, mualneitu Andorra lamin a chhanletna tur an nei lo.

Gareth Southgate-a kaihhruai England hian Thawhlehni zan dar 12:15-ah World Cup qualifier an khelh chhunzawm dawn a, Hungary an mikhual ang.

England hian group I-ah match sarih an khelh aṭangin tlawm an la nei lo a, point 19 neiin hma an hruai mek - anmahni hnaih bertu Albania aiin point liin an sang mek.

Hello England
Southgate-a'n Andorra a en nau a, player langsar captain Harry Kane, Jordan Henderson, Raheem Sterling, Declan Rice, Mason Mount leh Jack Grealish te ho bench-ah a dah.

Si ban nghak tur pawhin Southgate-a fa chuam Jordan Pickford aiah Sam Johnstone a lut a, Championship club West Brom player ni chunga England tana goal ven phak hi Johnstone tan chuan intihtheihna tham a ni.

Three Lions-in an player neih ṭhatte bench-a an dah chungin an mikhualna ramah tlangnel takin an khel a, Chilwell chuan minute 17-na lekah England tana a goal hmasa ber a khung - Jadon Sancho siamsak a ni.

Minute 40-naah Bukayo Saka chuan a khung ve leh a, Arsenal forward goal khung hi khel ṭha em em mai, Manchester City forward Phil Foden-a siamsak a ni.

Hei le Abraham
Chelsea tana a khelh phak loh hnua Serie A lama AS Roma tana vul mek Abraham-a'n bench-a Kane awm leh Dominic Calvert-Lewin inhliam zarzoin bul a ṭan a, Three Lions jersey hak a phu tih pholangin minute 59-naah an goal thumna a khung - Sancho siamsak a ni.

International break hmaa a match hnuhnung bera hnawhchhuah James Ward-Prowse-a'n England lamah a hmingchhia thaichhiatna remchang a nei a, Andorra keeper Josep Gomes-a'n a penalty pet dang mah se a let lehlam a pet goal.

Hun tawp nan minute li chiah a awm tawh tihah keeper Johnstone-a'n ṭha zetin ball a vawm chhuak a, Grealish chuan hei hi lo chang fuhin solo goal hmangin international football-a a goal hmasa ber a khung.

Andorra-in an mualpho khuhna turin goal an khung ve thei lo a, England senior team match-a hmeichhe referee hmasa ber Ukrainian referee Kateryna Mozul chuan ham rik a ham a, inkhel a tawp.