EPL club-ten Newcastle an ngai thei lo

Saudi Arabia Public Investment Fund-in pound maktaduai 305-a Newcastle United an lei avangin Premier League club dang 19-te an lungawi lo a, English top flight football thuneitute hnenah he thil a thlen theih dan chu sawifiah turin an ti.

Premier League club 19-te hian Magpies hralh chungchangin club neitu leh director test a paltlang theih dan chu mak an ti niin sawi a ni a, club hralh chungchanga rawn an ni lo chu mak an ti bawk.

Hei mai a ni lo - Saudi PIF-in Premier League club an lei hi tam takin an duh lo a, hei hi a chhan ber chu Saudi hi mimal dikna chanvo rah beh kawnga an hmingchhiat vang a ni.

Club-te hian Premier League thuneitute nena inhmuh an rawt a, Premier League club 19 board-te chuan hetiang ang club hralhna lian thama Premier League-in a rawn lo chu an lungawi loh thu an sawi a, Magpies hralh tum, rei tak inchiah tawh, tuna phal a nih thut dan hriat an duh bawk.

Saudi PIF hian Magpies leina 80% an tum a, a bak hi PCP Capital Partners leh Reuben Brothers te tum a ni thung. Premier League chuan Magpies neitu tharte hian club inrelbawlnaah Saudi sorkar a inrawlh loh tur thu an hrilh niin an sawi a, an intiam anga an awm lo a nih chuan hrem theih an ni bawk ang.