Match hmasa berah Raducanu a chak lo

Emma Raducanu chu US Open champion a nih hnuah tournament a hmachhawn leh hmasak berah a chak lo. British tleirawl hi Indian Wells Masters-ah a inlan a, a khingpui Aliaksandra Sasnovich chu straight set-in a hneh lo.

World number 22 Raducanu hi tun hnaiah a zawnin match 11 a chak thei a, tun ṭumah pawh hian chak tura rinkai a ni. Mahse, world number 100 Sasnovich lakah a che hlei thei lo, second round inkhelah hian 6-2, 6-4 in a chak lo a ni.

Raducanu hian a coach Andrew Richardson kaihhruainain US Open nomawi a chawi a, khawvel a barakhaih a nih kha. Amahearawhchu, kum 10 mi lek a nih lai aṭanga amah hretu coach nen hian an thawh dunna an ti tawp zui.

Coach nghet mumal nei loin inelna a hmachhawn zui a, thil a awlsam vek lo tih a lang nghal. Mi tam takain a coach ban vanga che chhe nghalah an ngai a, sawisel pawh a hlawh zui - chutih rualin a coach nen khan US Open atan bika in ruai an ni tih erawh hriat tel a ngai ve bawk.

Kum 18 mi Raducanu hian season tawp hmain a tam thei ang inelna hmachhawn a tum. Kar leh aṭanga khelh tur Kremlin Cup-ah inlan leh nghal a tum dawn - Moscow khawpuiah chuan result ṭha neih ngei a beisei ang.

Inkhel dangah Heater Watson hnehtu Sloane Stephens a che fuh chhunzawm thei bik lo. Stephens hi amah ang bawka American player Jessica Pegula lakah 6-2, 6-3 in a chak lo. US Open final-a chak lo zawk Leylah Fernandez erawhin Alize Cornet chu 6-2, 6-3 in a hneh ve thung.