Zanin dar 7:30-ah IPL ; Eliminator Royal Challengers Bangalore vs Kolkata Knight Riders

11th October, 2021

Indian Premier League vawi 14-na league round chu khelh zawh a ni ta a, thilmak a thleng ta lo. Zanin dar 7:30 hian playoff (Eliminator) khelh a ni dawn a, pathumna Royal Challengers Bangalore leh palina Kolkata Knight Riders te Sharjah Cricket Stadium-ah an inkhel ang.

Nizan khan qualifier 1-ah pakhatna Delhi Capitals leh pahnihna Chennai Super Kings te an inhmachhawn a, result kan hre hman lo. Qualifier 1-a chak zawk hian final an lut dawn a, a chak lo zawkin eliminator-a chak nen qualifier 2 khelin final khel tur an zawng ve leh ang.

Mumbai an tla
Champion lai Mumbai Indians-in playoff thleng pha turin match tawp berah Sunrisers Hyderabad an sawp a ṭul. Sheikh Zayed Stadium-ah Mumbai Indians-in over 20 lekah 235/9 runs tehmeuh an siam a, 'match fixing' awma ngaitu pawh an awm hman hial.

Mumbai tan hian Ishan Kishan (84) leh Suryakumar Yadav (82) te an che ṭha a, mah se palinaa awm Kolkata Knight Riders lehthal tur chuan 170 runs-a chak a ngaih avangin hmabak a la ko hle. Sunrisers top order te an che ṭha a, opener pahnih Jason Roy (34) leh Abishek Sharma (33) ten Mumbai playoff beiseina an titawp nghal der.

Sunrisers tan Manish Pandey-a'n thi loin 69 runs siam ve bawkin over 20-ah 193/8 runs an siam. Mumbai-in 42 runs-in hnehna chang mah se playoff khel turin a tawk lo.

IPL Eliminator
India captain Virat Kohli kaihruaina hnuaia khel Royal Challengers Bangalore hian ṭum thum 2009, 2011 leh 2016 khan final lut mah se an chak lo vek. Kohli hian tun season IPL zawhah captain hna chawlhsan a tum a, tun ṭum hi a captain-na hnuaia champion-na hun ṭha a ni.

Chutihrualin an khingpui tur Kolkata Knight Riders erawh vawi hnih final an luhah an champion ve ve a, Bangalore aiin an record a ṭha zawk. KKR hian league match hnuhnung berah Rajasthan Royals chu 86 runs tehmeuhin an sawp thei bawk.

League round-ah RCB leh KKR hi vawi khat ve ve an chak a, eliminator-a an inkhel turah pawh hian chak tur zawk hriatthiam a har a, inkhel hmuhnawm tak a beisei theih ang.