Murray a chak ve leh ta

Hun rei tak chhung result ṭha a neih loh hnuah Andy Murray chuan chak ni hmel a hmu ve leh ta. Britain tlangval hian Indian Wells Master a match hmasa berah Adrian Mannarino chu 6-3, 6-2 in a hneh.

California thlalera inelna neihah Murray hi duhsak takin wildcard pek a ni. Tun hnaiah result ṭha a neih loh avangin Murray hian fans puihna a dil hial a, a hmuna entu fans lamin world number 1 hlui hi an thlawp ṭha hle.

Kum 34 mi Murray hian a match lehpekah chuan Carlos Alcaraz a hmachhawn leh ang. Spanish rawlthar Alcazer hi seeded 30-na a ni phak a, round hmasa berah a inlan a ngai lo - Murray nen an inkhelh tur hi a match hmasa ber a ni ang.

Grand Slam vawi thum champion tawh Murray chuan, "Ka rilru put hmang a dik viauin ka hria. Point khat lek hlutna ka hrechiang a, chumi tur chuan theihtawp ka chhuah. Indian Wells-ah hian kum li hnua inlan leh chauh ka ni a, hnehna nena bul ṭan hi a hlimawm," a ti.

Murray hi a khel bawr hliam vangin 2018 leh 2019 khan zai a ni a, tun thlengin ngai a la awh leh rih lo. Murray chuan, "Ka taksa pawh a ṭha, ka beisei ang ngeiin kumin tawp lam chu ṭha takin ka khelh zel theih ka beisei," tiin a sawi.

Nimin inkhelah Daniil Medvedev chuan harsa vak loin hnehna a chang. Russian tlangval hian darkar khat leh minute 13 chhungin Mackenzie McDonald chu 6-4, 6-2 in a hneh; US Open nomawi a chawi hnua inelna a hmachawn hmasakah a talbuai lo hle.

World number 2 Medvedev hi seeded pakhatna pek a ni a, player langsar dang - Novak Djokovic, Rafael Nadal leh Roger Federer te an inlan loh avangin champion tura rinkai ber a ni.