Hawina lam apianga goal khung Ronaldo

Cristiano Ronaldo hming sawi leh 'Goal' sawi kan bang dawn lo. Portugal captain hian Qatar nen friendly match an khelh ṭumin goal a khung a, ram tan goal 112 a khung tling ta - ram tana a goal khung apiang hi record a ni chhunzawm zel.

Inrinni zan Estadio Algarve-a inkhelah Ronaldo hian minute 37-naah goal hmahruai a khung. Thla hmasa khan Ronaldo hian ram tana goal khung hnem ber Iran striker Ali Daei (109 goals) chu a lo khum tawh.

Ronaldo hi chawlhlawk thleng bak khelhtir a ni lo. Portugal tan hian Ronaldo bakah Jose Fonte leh Andre Silva ten second half-ah goal khat ve ve an khung bawk, team ṭha zawk an nih miau avangin harsatna an nei lo.

Match khel tam
Ronaldo hi kum 36 mi ni tawh mah se a tam thei ang inkhelh a la duh, goal khung bakah ram tana inlan hnem record a siam. Spain tana match 180 kheltu Sergio Ramos khumin European player zingah ram tana khel hnem ber a ni bawk.

Khawvel pum thlir erawh chuan inlan hnem ber a ni rih lo, kum 1984-a inkhelh chawhsan tawh Soh Chin Ann khan Malaysia tan match 195-ah a inlan - hliam nei loin Ronaldo hi a khel zel a nih chuan Chin Ann-a record pawh hi a khum theih mai a rinawm.

Tuna a lan dan chuan Ronaldo hian nakkum tawp lama khelh tur Qatar World Cup a khel dawn, qualifier bakah friendly match nena chhiar chuan World Cup hma pawhin match khelh hmabak a la nei nual a ni.

Fiahna pakhat
Ronaldo-a'n goal a khung a, ram a chakpui bawk; friendly match ni mah se Ronaldo chuan a ngaih pawimawh thu sawiin, "Fiahna pakhat chu kan paltlang leh phawt, duhthusam leh suangtuahna kan nei a, chumi ti hlawhtling tur chuan kawng dik kan zawh.

"Kan thil tum langsar ber chu Qatar World Cup khelh a ni," tiin a sawi a, nakkum World Cup khelh hunah chuan kum 37 a tling tawh dawn; February 5-a piang a nih avangin nakkum kum tawp lamah chuan kum 38 a hnaih zawk ang.

Mahse, Ronaldo hi a kum aṭanga tehtute chuan an la teh sual zel rih niin a lang. A taksa a invawng ṭha a, a insawizawi nasat bakah a hriselna ti chhe thei lakah a inveng fimkhur hle, a rah chhuah chu a taksa leh thiltihah a takin kan hmu.

Hmabak Luxembourg
Portugal hi World Cup qualifier lamah chuan group A-ah an awm, chawlh an nei rei hman dawn lo - Thawhlehni zanah Luxembourg an mikhual zui leh nghal dawn. Ronaldo awmna team tan playoff khelh hah ngai loa tlang tur chuan chak a pawimawh.

Inrinni zan khan group A ram ṭhenkhatin qualifying a khel. Serbia chuan Dusan Vlahovic-a goal khat hmangin Luxembourg hi 1-0 in an hneh a, match ruk aṭanga point 14 hmuin hmahruaitu an ni mek.

Portugal hi pahnihna ni rih mah se buaina tur erawh a awm dawn lo, an chunga mi Serbia aiin match khatin an khel tlem zawk. An khelh hmabakah hnehna an chang thei a nih chuan chuh buaitu awm loin hmahruaitu an ni leh ang.