Israel lakah Scotland an chungnung

Hun tawp dawna Scott McTominay goal khung hmangin Scotland chuan an mikhual Israel 3-2 in an hneh. Scotland hian World Cup qualifier khelh laiah group F-ah point 14 hmuin pahnihna dinhmun an luah.

Inrinni zan inkhelah Israel tan Eran Zahavi leh Munas Dabbur te goal hmangin vawi hnih hma an hruai hmasa, mahse mualneitu lamin John McGinn leh Lyndon Dykes ten an sut ve ve, hun tawp dawn thlengin goal a lut thei mai lo.

Ram pahnihin point an insem ngei dawn niin a lang hman, mahse minute 90+4-ah McTominay chuan chakna goal a khung; Steve Clarke-a naute hian pahnihna dinhmun an luah avangin playoff khelh an beiseina an chhawm nung.

Scotland hian an match hmabakah Faroes Islands leh Moldova te an hmachhawn dawn, ram pahnih hi table mawngphaha awm an ni a, beisei an neih tawh loh bakah player thlirin Scotland tan beisei a la sang ve hle.

Scotland coach Steve Clarke chuan, "Chawlhlawk lai khan ka naute hnenah, tuna inkhelh dan kha chu chak lo zia a nih kha tiin ka hrilh. Kan khelh dan phung pangngaia khel tur leh inkhel ti rang chunga ball chang tam turin ka fuih a, ka sawi anga an khelh theih avangin ka lawm," a ti.