Fabianski-a'n ram tana match hnuhnung a khel

Lukasz Fabianski chuan tun nipui lai khan ram tana inkhelh a chawlhsan thu a puang. An ram Poland hian inkhelhna hun hlu bik an siamsak leh a, Inrinni zan khan inlanin a ṭhian ten zahna chibai an buk.

Kum 36 mi Fabianski hian San Marino lakah a match 57-na a khel a, an ram hi 5-0 in a chakpui. Karol Swiderski, Tomasz Kedziora, Adam Buksa leh Krzysztof Piatek ten goal an khung bakah, Cristian Brolli chuan anmahni lamah a ti lut palh bawk a ni.

Fabianski hi keeper ṭha pangngai tak a ni a, ram tan pawh a inlan tlem hran lo. Mahse, Wojciech Szczesny (kum 31) a awm ve miau avangin khelhna a chang tam tawk lo a, amah aia naupang zawk a nih bakah thlan zawk a nih avangin Fabianski tan chawlh a hun.

Poland captain Robert Lewandowski chuan thlahna thu sawiin, "Lukasz Fabianski nang nena hun kan hmanho tawh zawng zawngah lawmthu ka sawi. Kum 15 chhung ram squad-a tel phak hi a nep lo a, hei hian i hlutna a ti lang chiang," tiin a sawi.

Hnehna an chan avangin Poland hian World Cup qualifier group I-ah point 14 an hmu a, pahthumna dinhmun an luah. An chungah England leh Albania te an awm, an hnuaia awm Hungary chuan point 10 an nei ve bawk.