Europe aṭangin tuten nge World Cup khel dawn?
World Cup khel tur zawnna neih chhoh a ni a, Europe aṭangin tling chiang la awm mah se match thum chauh khelh tur a awm tawh avangin Qatar-a zin tur a ngaihruat theih ṭan.
Zanin leh naktuk hian qualifier hi khelh chhunzawm a ni dawn a, match hnih khelh hmabak hi November-ah khelh a ni dawn.
Ram 13
Europe aṭangin ram 13-in World Cup an khel dawn a, tun ṭum qualifying round aṭangin ram 10 an tling dawn. Ram pathum dang hi playoff hmanga zawn tur a ni.
Playoff-ah hian group tina pahnihna ṭheuh bakah Nations League-a ti ṭha pahnih an tel ang. Ram 12 hi hmun thumah pali zela ṭhen hran an ni ang. Ṭhen hran pakhatah hian ram pali zel an awm ang a, semifinal leh final hmangin World Cup khel tur an zawng ang.
Group A
Serbia-in point 14 an hmu a, hma an hruai mek. Pahnihnaah Portugal awm mah se Serbia aiin match khatin an khel tlem.
Thawhlehni zanah Portugal-in Luxembourg an hmachhawn dawn a, Serbia-in Azerbaijan an mikhual thung dawn. Ram pahnih hi chak zawk tura ngaih ve ve a ni a, inkhel en châkawm zawk erawh Portugal leh Serbia hi group match hnuhnung berah November 14 khian an inhmachhawn dawn.
Group B
Pathianni zanah Sweden-in Kosovo 3-0 in an sawp a, Thawhlehni zan dar 12:15-ah an hnuai chiaha awm Greece an hmachhawn dawn. Sweden hi an chak a nih chuan khelh zat inangah Spain aiin point hnihin an hmu tam thei ang.
Spain leh Sweden te hi November 14 hian group match hnuhnung berah an inkhel dawn. Chutihrualin Luis Enrique hote hian a chhe berah playoff chu an khel phak chiang tawh.
Group C
Switzerland-in Nothern Ireland an hneh a, European champion Italy an hnaih zel. Thawhlehni zan hian Switzerland-in Lithuania an tlawh dawn a, an chak a nih chuan Azzuri nen point 14 ve ve an hmu ang.
November 12-ah Italy leh Switzerland hi Rome-ah an inkhel dawn a, he inkhel result hian Qatar-a zin tur a hril ang.
Group D, E & F
Ukraine-in Inrinni zanah Finland hneh mah se hmahruaitu France point liin an pha lo. Les Bleus hi group hmahruaitu an nih ngei hmel a, group D aṭang hi chuan playoff khel tur a chiang lo. Ukraine leh Bosnia and Herzegovina ten pahnihna an inchuh ang.
Group E-ah Belgium (16 points) dinhmun a ṭha. Zirtawpni khan Czech Republic leh Wales te 2-2 in an inhnehtawk a, point riat ve ve an hmu mek bawk. Ram pahnih aṭanga pakhat hian playoff an khel ang.
Group F-ah Denmark-in point 21 an hmu tawh a, Scotland-in Inrinni zan khan an elpui Israel hnehin playoff khel turin an dinhmun a ṭhat phah hle.
Group G
Netherlands hi Louis van Gaal hnuaiah an insiamṭha a, Zirtawpni zan khan Latvia 1-0 a hnehin point 16 an hmu a, hmahruaitu an ni.
Oranje hnuaia awm Norway (14 pts) leh Turkey (12 pts) te 1-1 in an inhnehtawk. He group aṭang hi chuan tling tur hriatthiam a la har a, November 16-a Netherlands leh Norway inkhel tur a pawimawh ang.
Group H, I & J
Group H-ah Croatia leh Russia ten Zirtawpni zan khan Cyprus leh Slovakia te an hneh a, point 16 ve ve an hmu. Ram pahnih hi November 14-ah an inkhel dawn a, World Cup khel tura tling nghal tur leh playoff khel tur a hril ang.
Group I-ah England-in Andorra 5-0 in an sawp a, point 19 hmuin an dinhmun a ṭha. Poland pawhin San Marino 5-0 a sawpin playoff beiseina an la nei. Robert Lewandowski telna ram hian Albania nen playoff hmunruak pakhat an inchuh ang. Thawhlehni zan hian Albania-in Poland an mikhual dawn a, inkhel pawimawh bik a ni ang.
Group J-ah Germany-in Romania 2-1 in an hneh a, Hansi Flick-a naute hian zanina North Macedonia an hneh chuan inkhel dang result a zirin an tling thei tawh hial. North Macedonia, Armenia leh Romania ten playoff khel tur hmunruak pakhat an inchuh ang.