Muller-a'n goal a khung leh ta

Germany-in Zirtawpni zan khan World Cup qualifier-ah Romania 2-1 in an hneh a, chakna goal hi minute 81-naa Thomas Muller-a khung a ni.

Volksparkstadion-ah Romania tan Ianis Hagi-a'n goal ropui a khung a, box chhungah Chelsea defender Antonio Rudiger-a kap karah khungin minute 9-na lekah goal hmahruai a khung.

Romania hi match hnuhnung pathuma goal chhuah tawh lo an nih avangin tlarhnung a phui ṭha a, mualneitu Germany-in minute 52-naah Serge Gnabry 'shot' ṭha zet hmangin siphurh an sut.

Hansi Flick-a'n minute 67-naah bench aṭangin Muller a luhtir a, Bayern Munich forward hian Leon Goretzka tauh pial chu hnai tak aṭangin a khung. Kum 32 mi Muller hian World Cup 2018 leh Euro 2020-ah goal a khung lo a, March 26, 2017-a World Cup khel tur zawnnaa Azerbaijan lama a khung hnua competitive match-a a khung lehna hmasa ber a ni.

Bayern Munich manager hlui Flick-a hnuaiah Germany-in match li khel tawhin an la chak vek a, Romania lakah hian 2-1 chauhin chak mah se 78% ball an chang thei a, pressure na taka an pek bawk avangin Joachim Low hnuaia an khelh dan nen a danglam ta hle.

Germany hian zanin dar 12:15-ah North Macedonia an hmachhawn dawn. Die Mannschaft hian April thlatir khan Joachim Low hoin North Macedonia hi an mualah 2-1 in an hneh lo.

Germany coach Hansi Flick chuan, "Romania khan goal venhim an thiam tih kan hria a, chumi ti thei tur player pawh an nei. Mahse, minute 90 chhung theihtawp kan chhuah a, point thum duhin kan tui hal a ni," tiin a naute a fak.

Flick hian coaching staff-ah Mads Buttgereit a lalut. Danish coach hi set piece lam expert a ni a, a hnathawh a lang chho ṭan. Romania laka Germany chakna goal hi corner kick aṭanga lut a ni.