Messi kha a thlawn pawha a châm duh ka ring - Laporta

Barcelona president Joan Laporta chuan Lionel Messi chungchang a sawi leh a, Argentina captain chu a thlawn pawha a cham duh a rin hial thu a sawi.

Kum 59 mi Laporta chuan, "Messi chungah khan ka thinrim lo a, amah hi ka ngaihsan bakah ka zah em avangin thinrim thei pawh ka ni lo. Mahse, inremna kan nei thei lo tih kan hriat khan anni leh keini lam kha kan hnual ve ve. Barcelona a cham duhna lian tak a nei tih ka hria a, amaherawhchu Paris lama sawmna avangin pressure lian tak a nei bawk," tiin club legend chunga thinrimna a neih loh thu a sawi.

Laporta hian 2003-2010 chung khan Barcelona president hna hi a lo chelh tawh a, kumin March thla khan President-ah thlan tlin leh a ni. President atana au hlaah Laporta hian Messi chelh a tum thu a sawi.

Amaherawhchu Josep Maria Bartomeu hnuaiah Barcelona sum dinhmun a ṭha lo a, Messi-a'n a hlawh 50% a a tihniam chung pawhin an pe thei lo a, PSG a pan a ṭul phah. Laporta chuan, "PSG khan contract ṭha tak an zawrh tih kan hre vek a, chutihrualin a chhuah dawn thleng khan Messi kha a thlawn pawha a khelh duh rinna ka nei tlat.

"Kha thil kha thleng se ka duh a, duh se chuan kei chuan ka pawm. La Liga pawhin an hrethiam ang. Amaherawhchu anni ang chin tawhah chuan hlawh nei lo turin ngen a rem lo. Chutichung chuan President ka nih laia first team-a a tel dan ka hrechiang a, an chhungkua hi vawi tam tak ka pui. Amah ka hriat chian em avangin beiseina ka nei a, kan club dinhmun ṭhat hunah kan thungrul ve leh dawn tih a hre si," tiin hlawh nei loa Messi a cham theih a beisei thu a sawi.

Kum 34 mi Messi erawhin PSG jersey hain Ligue 1 leh Champions League-ah a inlan tawh a, khawvel player ṭha bera mi tam takin an chhal hi Paris-ah a cheng tawh. Laporta thusawi avangin France rama kartin chanchinbu France Football-in Messi hi an kawm ve nghal.

Argentina captain chuan, "Barcelona-a ka let khan season thar atana inpuahchah tura let ka ni. Ka ngaihdanah chuan engkim a fel vek tawh a, contract-a hming ziah chauh a ngai tawhah ka ngai. Ka ruahmanna kha a buai ta vek a ni. Free agent ka nih chiah khan sawmna ka dawng nghal. PSG nen khan beisei aia rangin inremna kan nei. French club hmachhawp, player neih dan leh club kalphung hi ka ril rem zawng a ni," tiin Barcelona nen an inṭhen fel hnuah chauh PSG nen an inbiak thu a sawi.

PSG director Leonardo pawhin Messi a chhan a, Brazil international hlui chuan, "Messi khan Barca-a cham turin thutlukna a siam. Barcelona-in a chhuah tur thu an sawi hnuah chauh inbiakna kan neihpui," tiin a sawi.