Nations League champion France

Kylian Mbappe-a'n goal sawi hlawh leh pawimawh tak khungin Nations League-ah France a champion pui. Pathianni zan San Siro-a inkhelah Spain-in Mikel Oyarzabal hmangin goal an khung hmasa a, Les Bleus-in Karim Benzema goal ropui hmanga an sut hnuah Mbappe-a'n chakna goal a khung a, Didier Deschamps-a hote 2-1 in an chak.

Spain captain Sergio Busquets chu best player atan thlan a ni a, chakna goal khungtu Mbappe-a'n top scorer chawimawina a dawng. PSG forward hian goal leh assist vawi hnih ve ve a nei a, goal hnih khungtu dang Karim Benzema leh Ferran Torres ten assist an nei ve lo.

A hmuhnawm
Nations League hi friendly match ur awrh anga ngaih ni mah se final erawh a danglam hle - stadium chung boruak chu World Cup final ang mai a ni. Ṭan phat aṭangin inkhel a nung a, first half-ah goal hmuh tur a awm lo.

Second half-ah erawh chance ṭha zawk hmuh tur a awm a, goal hmuh tur a awm ta bawk. Les Bleus goal bawh a na a, Benjamin Pavard-a pass chu Mbappe bul a thleng hmain Marcos Alonso-a'n a dang hram.

Mual vei lam aṭanga France-in an nawr na a, Benzema ball pek chu Belgium laka chakna goal khungtu Theo Hernandez-a'n crossbar a pet per a, a goal lo chiah chiah. Deschamps-a hoten chance ṭha an hloh hnu lawkah Spain-in goal an khung ta zawk.

Minute 64-naah Sergio Busquets-a ball vawrhluh chu Mikel Oyarzabal-a'n um lutin goal-ah a chantir a, France tlarhnung a phui tawk lo. Mahse, minute hnih hnu lawkah Benzema-a'n box kil aṭangin goal kilah a hlai lut a, 1-1 a ni. Real Madrid forward hian a class zia a pholang.

Mbappe-a'n chance ṭha ṭum hnih a hlah a, chumi hnuah sawisel hlawh takin goal a khung. Minute 80-naah Hernandez-a ball pek chu Mbappe hian umlutin goal-ah a chantir a, PSG forward hi a offside ngei niin a lang.

Spain-in Oyarzabal leh Yeremi Pino te hmangin siphurh sut theihna hun an nei a, goal-ah ṭha zet pet ve ve mah se keeper Hugo Lloris-a'n a dang. La Roja hian 64% ball possession nei mah se France-in goal khungna chance ṭha an ngah zawk a, chak an phu zawk.

Sawisel hlawh goal
Milan wing back Theo Hernandez-a'n through ball pe tura ball a petchhuah laiin Mbappe a fual ber a, offside tura ngaih a ni. Mbappe-a'n a goal khung a lawm pawhin Aymeric Laporte chuan inringtawk takin a ban a phar a, VAR hmangin thil thlen dan pawh an ennawn.

Referee erawhin Spain defender Eric Garcia-a'n Hernandez a through ball hi a khawih avangin offside-ah a ngai lo a, La Roja lam tan chuan hriatthiam a har khawp ang. Chutihrualin Laporte leh Cesar Azpilicueta te chuan an goal neih an hum rei lo lutuk chu an chak loh chhanah an ngai thung.

Thlirna Tawi
• UEFA hnuaiah ram inelna pahnih Euro C'ship leh Nations League a awm. Nations League hi kum 2018 aṭanga khelh ṭan a ni a, ram inkhelin ngaihven a hlawh theih nana friendly match tam zawk thlak nana tih a ni.
• Nations League-ah hian UEFA hnuaiah ram 55 chu league pali - League A, B, C leh D-ah ṭhenhran an ni.
• Inelna hmasa ber League Phase hi September 6 – November 20, 2018-ah khelh a ni a, Nations League Finals hi June 5-9, 2019 chhung khan an khel. Finals hi League A group pali zinga ti ṭha palite chauhin an khel thei a, Portugal an champion. Netherlands, England leh Switzerland ten finals hi an thleng.
• Tun ṭum hi Nations League vawi hnihna a ni a, league phase hi September 3 – November 18, 2020 khan khelh a ni. Finals (playoff) hi October 6-10 chhung khan khan Italy, Belgium, France leh Spain ten an khel a, Les Bleus an champion.

Pathumna Italy
Nations League-ah Italy chuan Pathianni zan khan Belgium 2-1 a hnehin pathumna an ni. Juventus Stadium-a inkhelah hian Azzurri-in Nicolo Barella leh Domenico Berardi penalty te hmangin goal an khung hmasa a, Red Devils tana Charles De Ketelaere a thun chuan hun tawp lam inkhel tihmuhnawm sawt mah se result erawh a thlak danglam pha lo.

Belgium-in inhliam vangin an player pawimawh pahnih Romelu Lukaku leh Eden Hazard te an chhawr thei lo a, chutihrualin European champion Italy pawhin player khel tlem zawkte khelhna hun atana an hman avangin Red Devils tan player ṭha awm lo hi chhuanlam a tling lo.

Belgium midfielder Kevin De Bruyne chuan, "Team ṭha pahnih kan hmachhawn a, kan ti ṭha thawkhat hle. Result hi a pawimawh ber a ni lo a, player ṭhahnem takin inelna sang an khel kha a hlu," tiin Nations League-a pathumna nih chu a pawimawh ber loh thu a sawi.

Italy coach Roberto Mancini chuan, "Match pawimawh pahnih kan khel a, player pawh kan thlak nual chungin kan khel ṭha hle. Midfield leh forward-ah player chhawr tur kan neih belhah ka ngai a, ka naute khelh danah ka lawm," tiin a sawi.

European champion kan hneh a, world champion nen kan inkhel tawk hle. Amaherawhchu kan goal khung kha kan hum rei lo lulai deuh a, kan goal khung avanga kan lawmna pawh a reh hmain siphurh an rawn sut. Football hi chu pawm thiam a har ṭhin. Chance ṭha kan neih te kan khung loh laiin Karim Benzema erawhin chance awm mang lo aṭangin goal a khung. - Luis Enrique, Spain coach

Ka naute ka chhuang a, ka hlim bawk. Kan team-ah hian theihna chauh a awm lo a, ka player-te hi rilru huaisen leh paukhauh tak tak an ni. Nomawi kan inchuh tih an hria a, chak ngei an duh a, kei pawhin ka duh. Final-ah chuan chak zawk nih hi a hlu ṭhin. - Didier Deschamps, France coach