India hmeichhe team-in Bahrain sawp

SAFF Championship-ah mipa team-in harsa taka Nepal an hneh hram laiin India hmeichhe team erawhin Asian team ṭha Bahrain chu 5-0 in an sawp a, Pyari Xaxa (19’; 68’) chuan goal hnih khungin Sangita Basfore (13’), Indumathi Kathiresan (34’) leh Manisha Kalyan (69’) ten goal khat ṭheuh an khung bawk.

India hmeichhe team-te hi United Arab Emirates lamah friendly match khelin an thang mek a, an match hmasa berah mualneitu UAE chu 4-1 ngawtin an sawp a, mahse, kar hmasa Thawhṭanni khan Tunisia chu 1-0 in an ngam lo.

Pathianni zanah erawh India hmeichhiate an insiamṭha lehnghal a, harsatna nei loin Bahrain hi 5-0 in an sawp. Nilaini zan dar 8:30-ah India hi an inlan leh dawn a, Chinese Taipei nen friendly match hi an khel leh dawn a ni.

India hi Sweden leh Nigeria hmeichhe team pawh lo enkawl tawhtu Thomas Dennerby kaihhruaina hnuaiah an khel a, kum 62 mi coach chuan, "Kawng engkimah hmasawn tumin kan bei a ni," tiin result ṭha nei tura an thawhrim thu a sawi.