Messi hoin Argentina an chak

Argentina leh Lionel Messi ten chanchin lawmawm an nei chhunzawm zel. South American player zinga ram tana goal khung hnem ber Messi-a'n goal a khung belh a, an ram hi an mikhual Uruguay lakah 3-0 in hnehna a chanpui.

Nimin zing South America aṭanga World Cup qualifier inkhel dangah Brazil leh Colombia chu goal awm loin an inhnehtawk. Tite-a naute hian a zawnin match kua hnehna an chang a, tun qualifier bikah chuan point an hlohna hmasa ber a ni hial.

Goal thum
Buenos Aires khawpuiah Argentina hian mikhual an lo thleng a, a hlauhawm hmasa zawk chu Uruguay an ni. Luis Suarez-a'n sir deuh tak aṭangin a hlap pawp a, a hnuah six yard box bul aṭangin a volley bawk - mahse heng pahnih hi keeper Emiliano Martinez-a'n a lo dansak.

Atletico Madrid striker hian mual sir chep tak aṭangin goal ban a tih per bawk a, a vannei thei lo. Suarez a vanneih loh laiin Barcelona tana a khelhpui ṭhin Messi erawh a vannei thung - Argentina captain ball pek hi Nicolas Gonzalez-a'n a tlawh phak lo a, mahse keeper in a man phak loh avangin a goal.

Mualneitu an hlauhawm chhunzawm a, midfielder Rodrigo de Paul-a'n hnai tak aṭanga an goal hnihna a khung bakah, tunlai striker hmuhnawm berte zinga mi Lautaro Martinez khung tur a siamsak bawk.

Messi a lawm
Tun hma chuan South American player zingah Brazil legend Pele (77 goals) chu ram tana goal khung hnem ber a ni ṭhin, tunah chuan Messi-a'n goal 80 a khung tlin tak avangin a khum a, chawimawina hlan a ni.

Paris Saint-Germain forward Messi chuan, "Uruguay kha an hlauhawm hle, mahse goal kan khung hmasa a, engkim mai khan kan duh danin a kal chhunzawm a ni ber mai," tiin a sawi a, ram tana match 155 a khelh ṭumin an chak.

Lionel Scaloni enkawl La Albiceleste hi match 24 chhung tlawm loin an kaltluang mek a, qualifier lamah pawh hmahruaitu Brazil nen World Cup khel turin an tling chiang tawh anga sawi ngam a ni - chhiarkawp danah erawh an la tla ve thei tho.

Brazil an chelh
Tite-a'n world champion nih a tum avangin match zawng zawngah chak chhoh zel a duh a, mahse hnehna chan reng theih a ni bik ta lo. World champion vawi nga ni tawh hian Colombia mualah goal an khung theih loh avangin point khata an lungawi a ngai.

Brazil tan hian Manchester United midfielder Fred, Leeds winger Raphinha leh Ajax hmatawng Anthony ten an hun ṭha neih an bawhpelh vek a, bench aṭanga lut Raphinha-a'n hun tawp dawnah remchang hmu mah se keeper David Ospina a paltlang thei lo.

Selecao (Brazil sawina) hian October 15, Zirtawpni zingah Uruguay an mikhual leh dawn. World champion hmasa ber Uruguay hi an dinhmun a la ṭhat tawk loh avangin chak mamawh an ni a, thapui an thawh dawn avangin Neymar leh a ṭhiante tan hmachhawn an awlsam lo ang.