Nepal hnehtu India tan final beiseina
Mizo tlangval Lalengmawia'n India jersey ha chungin Nepal a hmachhawn a, Apuia inlan zanah SAFF Championship 2021-a chak la nei lo India an chak a, 1-0 in Nepal an hneh.
Blue Tigers goal awmchhun hi Sunil Chhetri khung a ni a, India captain hian ram tan match 123 a khelhah goal 77 a khung tling ta a, international football-ah Pele goal khung zat a khung tling ve ta.
India tan Lalengmawia (Apuia) chuan inkhel bul a ṭan a, Vaivakawn tlangvalin SAFF Championship-a bul a ṭan vawi khatnaah India-in hnehna an chang nghal. India-in Nepal an hneh avangin SAFF Championship-ah final luh beiseina an nei thar leh ta a, Nilaini zan dar 9:30-ah inelna thlengtu Maldives an hneh chuan final an lut ang.
Chhetri 77
India-in an match hmasa berah player tam zawka khel chungin Bangladesh an inhnehtawkpui a, sawisel an tawk nasa hle. Match hnihnaah hneh ngei tura ngaih Sri Lanka an hmachhawn a, an chak zo chuang lo!
India-in ro an relna ṭhin SAFF-ah final lut turin Nepal hneh ngei an mamawh tih an hria a, sawiselna tawktu Igor Stimac pawhin hei hi hrechiangin player a rawn siksawi a, tun inelnaa bul ṭan la nei lo Apuia leh Brandon Fernandes ten bul an rawn ṭan - Sri Lanka laka bul ṭan aṭangin player panga a thlak danglam.
Blue Tigers hian an match hmasa pahnih ang thoin an khel ṭha a, mahse, goal hmaah an hriam tawk loh avangin goal an khung thei lawk lo. Hun tawp nan minute riat chiah a awm tawh tihah Chhetri a vannei ta nge nge a, India captain hian goal a rawn khung.
Bengaluru striker hian ram tan goal 77 a khung tling ta a, international football-a goal khung tam lamah pariatna a ni phak. International football la khel mek zingah Cristiano Ronaldo (112 goals) leh Lionel Messi (80) chiah a phak tawh lo.
Apuia a ṭha
Indian Super League-a player man to ber Apuia'n a man to chhan pholangin a khel ṭha takzet a, Mumbai City midfielder thar hian midfield-ah Nepal goal nawr tur a chhu chat hnem hle.
Lua hliam tenau nei Apuia hi minute 87-naah lakchhuah a ni a, NorthEast United aṭanga hming chhertu midfielder an lakchhuah hnuah minute rei lote chhungin India tlarhnung dinhmun a hlauhthawnawm hman.
Apuia chuan, "First XI ka chan loh ṭhin chhan ka hre lo a, mahse, coach-in hun ṭha min pek erawh ka bawhpelh loin ka hria a, bul ka ṭan chhunah kan chak. Hei vang hian coach pawhin min hman chhunzawm zel ka beisei," tiin Vanglaini a hrilh.
FIFA Under-17 World Cup-a India tana lo inlan tawh Apuia chuan a hliam chungchang Vanglaini hrilh zuiin, "Ka lu hi hmun hnihah an ṭhui a, ngaihtuahawm erawh a ni lo a, hliam dang pawh ka nei lo," tiin a inkhelh zel theih tur thu a sawi.
Hmabak Maldives
Pathianni zan inkhel dangah Maldives-in 1-0 in Sri Lanka an hneh a, point ruk nen hmahruaitu an ni mek. Ali Ashfaq chuan inkhela goal awmchhun hi a khung a, ani hi Nilaini zana India nen an inkhelh hunah pawh ven bik ṭul a ni dawn.
India-in final lut turin an match tawp berah chak ngei ngei an mamawh a, Nilaini tlai dar 4:30-ah Bangladesh leh Nepal an inkhel dawn bawk - team pahnih result-in India dinhmun a nghawng pha lo ang.
Apuia chuan, "SAFF bikah chuan ranking nei sang ber team kan ni a, team ṭha ber pawh kan niin ka hria. Hei vang hian kei chuan final luh ka beisei a ni," a ti a, final aia hniam zawk a thlir lo.
SAFF Championship-ah ram pangain inelna an hmachhawn a, an inkhelh kual vek hnua a sang pahnih chuan South Asia huam chhunga football thiam ber zawngin final an khel dawn a ni.