Murray hmachhawn tur Zverev

Indian Wells Masters khelh laiah Andy Murray chuan Carlos Alcaraz hnehin third round a lut a, a match lehpekah chuan Alexander Zverev a hmachhawn ang - inkhel awlsam a ni tawh dawn lo.

Nimin zing khan Murray hian Spanish rawlthar Alcaraz hi 5-7, 6-3, 6-2 in a hneh. Set hmasa berah hian Murray-a'n 3-0 in hma a hruai fal a, mahse 4-4 a nih rualpui leh hnuah a service a hloh a, set a chan zui bawk.

Amaherawhchu, set hnuhnung pahnihah Murray hian a tawnhriat neih hnem a chhawr ṭangkai. World number 1 hlui Murray chuan, "A awlsam lo, set hmasa ber ka hloh hnua ka beih let theih danah erawh ka lawm," tiin a sawi.

Britian tlangval hian a match hmasa zawka hnehna chang tur pawhin set thum a khel a, inelna neih laia match hnih chauh la khel mah se thahrui a hmang hnem tawh viau, seeded pathumna Zverev lakah chuan set hloh hmasak a pawi thui tawh ang.

Inkhel dangah Zverev pawhin nuamsa takin hnehna a chang bik lo. German star hian American tlangval Jenson Brooksby chu 6-4, 3-6, 6-1 in a hneh a, point score en mai chuan awlsam hmel angin lang mah se Zverev tan hna a awlsam lo.

Olympic champion Zverev chuan, "Ka khelh ṭhat ber ṭum chu a ni lo, mahse season ka hman ṭhat ber kum a ni a, vanneih thlak takin ka chak leh mai ṭhin," tiin a sawi a, a hmabak a hautak tur thu a sawi bawk.

Kum 24 mi Zverev hi season tawpa khelh tur ATP Finals atan a tling ta chiah, a thiam zual pariat inelnaah hian 2018 khan hlawhtlinna a lo chang tawh. Kuminah hian Turin khawpuiah an khel dawn - Daniil Medvedev, Stefanos Tsitsipas leh Novak Djokovic te pawh an tling tawh a ni.