Dhoni a la 'tar' lo

Indian Premier League-ah Chennai Super Kings chuan qualifier 1-ah Delhi Capitals chu wicket li a hnehin final an lut. Chennai-in hnehna an chan theih nan kum 40 mi Mahendra Singh Dhoni a che ṭha takzet.

League round-a pakhatna Delhi tan final luh theihna kawng a la inhawng. October 13, Nilaini zan dar 7:30 hian qualifier 2 khelh a ni dawn a, Delhi hian nizana Royal Challengers Bangalore leh Kolkata Knight Riders te an inkhel ang.

Dubai International Stadium-ah Chennai-in vawm hmasak an thlang. Capitals tan opener Prithvi Shaw-a'n ball 34 lekah 60 runs a siam a, captain Rishabh Pant-a'n thi loin 51 runs a siam bakah Shimron Hetmyer-a'n 37 runs a siam ve bawk.

Delhi-in 173/6 runs an siam a, Chennai tan target harsa an chhawpsak. Opener Ruturaj Gaikwad-a'n 70 runs siamin Robin Uthappa-a'n 63 runs siam mah se chak lo thei dinhmunah an ding.

CSK hian over 19-naah 160/5 runs an siam a, chak turin over tawp berah 13 runs an mamawh. Delhi bowler Tom Curran-a'n Moeen Ali rawn vawm hlum nghal mah se Dhoni-a'n four runs vawi thum a vuaksak a, ball hnih bangin 173/6 runs Chennai Super Kings a chakpui. Dhoni hian ball ruk lekah 18 runs a siam a, hun harsaah mi bik a nihzia a pholang.