Bottas hun a inher chhuak ve ta
Valtteri Bottas chuan Formula 1 Turkish Grand Prix-ah hnehna a chang a, car intlansiakna sang berah hian tun season chhunga hnehna a channa hmasa ber a ni - pahnihna dinhmun luahtu Max Verstappen pawhin driver championship lamah hma a hruai leh ta.
Pathianni zana inelna neihah hian Lewis Hamilton chu panganaah a thleng a, champion lai hian hun tawp dawn lamah pitstop a hman a ngai a, a hmaah driver pali ngawt an thlen hmasak avangin a lungawi lo hle.
A hmasa berah Bottas
Instanbul Park-ah Bottas chuan a hmasa ber aṭangin inelna a hmachhawn ṭan a, Pierre Gasly leh Fernando Alonso ten nawr buai viau mah se lap 58 tlan tur zinga lap 38 an tlan thleng chuan a hmasa berah a tlan reng.
Mahse, a motor ke thlak a ngai a, hetih chhung hian Charles Leclerc chu a hmasa berah a tlan zuai. Amaherawhchu Finland tlangval hian harsa vak loin hma a hruai leh mai a, car intlansiakna sang berah hian kuminah a chak vawi khatna ni mah se, a pumpuiah ṭum 11 a chak tawh.
Mercedes driver Bottas chuan, "Intlansiak vek ni mah se a hmun a zirin thil a danglam zel a, eng anga chet tur nge tih thutlukna siam thiam a harsa ṭhin hle. A pumpui thlir chuan inelna ka hmachhawn tawh zinga a ṭha ber a ni hial ang," a ti.
Tun season tawp rualin Bottas hian Mercedes a chhuahsan tawh dawn, tunah hian championship-ah pathumna a ni mek a, a champion phak chiah lo a nih pawhin a sang thei ang ber thlen ngei a duh ang tih chu a chiang.
Lewis a lawm lo
Engine part a hman hnem tawh avangin Hamilton hi hrem a ni a, 11-na aṭangin inelna bul a ṭan. Britain tlangval hi a tlan ṭha hle a, hnehna chang tur angin lang lo mah se a chhe berah pathumna dinhmun luah tur angin a lang hman hial.
Mahse, lap riat chauh tlan tur awm tawhna a team lamin pitstop hmang turin an ti a, motor ke a thlak chhungin hun a paih zauh a, hetih chhung hian Sergio Perez leh Charles Leclerc ten an tlan pel a, a tawp thlengin a um phak tawh lo.
World champion vawi sarih ni tawh Hamilton a lungawi lo, hmai tuamna vuah mah se a ṭawng ri hriat theih khawpin a aw ki a tisang. Lewis chuan, "Tyre a ṭha lo a, engtia rei nge ka hman theih dawn tih chu ka hre bik lo, mahse a tawp lam tlan chak kha ka duhdan a ni zawk.
"Ka duh danah chuan kha aia hma zawk khan tyre thlak thei ila, ka tawn pawh insiamṭhat lehna remchang a awm zawk ang," tiin a sawi. Hamilton hian tun season-ah vawi nga chauh hnehna a la chang, nikum nen chuan a inthlau hle.
A aia chak a ngai
F1 champion nih tuma inelna chuan a vawr tawp a thleng chho mek a, intlansiak paruk chauh hmachhawn tur an nei tawh. Hmahruai mektu Verstappen chuan Hamilton hneh tur chuan tun aia an tlan chak zual a ngaih thu a sawi.
Red Bull driver hian kuminah vawi sarih hnehna a chang tawh, ani aia chak tam an awm lo. Mahse, a elpui hautak ber Lewis chuan a thlah fal duh bik lo, intlansiak pakhat lekah an dinhmun hi la inhlak danglam thut thei a ni tih hriat a ṭha.
Kum 24 mi Verstappen chuan, "Hma ka hruaina hi point ruk chauh a la ni a, engmah lo mai a la ni. Mercedes leh Hamilton hian nasa lehzual zawkin min nawr dawn tih chu thil chiangsa a ni a, chuvangin keimahni lam pawh kan inbuatsaih a ngai dawn.
"A nihna tak sawi chuan tun kar tawpa inelna bikah khan keini aiin Mercedes an tlan chak zawk, chuvangin hlawhtlinna chang tur chuan tun aia chak zawka kan tlan a ngai," tiin thiam takin a team lakah car chak lehzual zawk a ngen.