Qatar hi ka tawpna tur a ni thei - Neymar

Khawvel player manto ber Neymar chuan Qatar-a World Cup khelh zawhah World Cup dang khelh theih a inbeisei loh thu a sawi.

Brazilian forward hi tunah hian kum 29 mi a ni a, World Cup 2026-ah chuan kum 34 mi a ni dawn. PSG forward chuan, "Ka World Cup hnuhnung ber a nih ka ring. A hnuhnung ber tur angin ka inpuahchah a, a chhan chu ka taksa hian pressure na tak hi a dawnsawn theih ka ring tawh lo.

"Kan ramin nomawi kan chawi theih nan ka theihna zawng zawng ka chhuah dawn a, World Cup nomawi lak hi ka naupan lai aṭanga ka duhthusam a ni," tiin a sawi.

Hetihlai hian khawvel player ropui ber zinga mi Lionel Messi leh Cristiano Ronaldo te hi nakkum World Cup-ah chuan kum 35 leh kum 37 an ni dawn a, Qatar khelh ngei an la tum ruh hle.