Sum chiah an ngaihtuah - Courtois

Real Madrid keeper Thibaut Courtois chuan European football-a thuneitu sang ber UEFA chu sum chauh ngaihtuahah a puh a, "Player-te himna leh ṭhatna tur an ngaihtuah lo," tiin huaisen takin a kap.

Belgium hian UEFA Nations League final an luh zawh loh hnuin pathumna inchuhah Italy an hmachhawn a, an chak zo lo - an inkhelh hma hian Courtois hian pathumna inchuha inkhelh hi ṭul a tih loh thu a sawi a, an chak loh hnuah pawh UEFA leh FIFA a dim chuang lo.

Khawvela goalkeeper langsar pawl chuan, "Sum chauh an ngaihtuah avanga inkhel mai kan ni a, zep tur a awm lo. He game kan khelh chhan hi television-a inkhel pekchhuah tur neih belh vanga UEFA-in sum leh pai an hmuh belh vang chauh a ni," a ti.

Kum 29 mi keeper chuan sawi zawmin, "Nakkum November-ah World Cup khelh leh a ngai a, chuti chung chuan June thla tawp vel thleng kan inkhel leh phawt ang.

"Hetiangte chuan kan inhliam mai dawn asin! Tuman player chungchang an ngaihtuah lo. Season rei tak hnuah Nations League match tam tak khelh a ngai a, kar hnih vel chawlh kan nei ve ang - level sang taka thla 12 chhung khelh reng duh player tan chuan a harsa a ni," a ti.

Courtois a ang tui laklawh a, Belgium keeper hian insum a tum lo. Courtois chuan, "Engmah kan sawi loh chuan a ngai reng ang a ni mai ang. Super League an duh lo em em a, mahse, an duh loh em emte chet dan thoin an che si.

"Sum an hmuhna tur chauh an ngaihtuah a, chu chu a ṭha lo em em a ni. Tunah chuan Euro emaw World Cup emaw kum tin neih an duh thu kan hriat leh tak hi. Engtikah nge chawlh hahdam hun kan neih ve dawn?

"Hetiang chuang player an inhliam reng ang a, chu chu a tawpna chu a ni mai. Khawl kan ni lo a, hei aia duat zawk kan mamawh. Tuman min ngaihtuah lo," a ti a, a insum lo.